"Ukraynada 4 minə yaxın məhbus cəbhəyə göndərilmək üçün azad edildi" - "The Guardian" nəşri

Ukrayna Silahlı Qüvvələrində kadr çatışmazlığını aradan qaldırmaq üçün Ukraynada təxminən 3,8 min məhbus vaxtından əvvəl azad edilib.

Bu barədə “The Guardian” qəzeti Ukrayna Ədliyyə Nazirliyinin məlumatlarına istinadla yazıb.

Nəşrin məlumatına görə, ümumilikdə 5,8 min məhbus Ukrayna Silahlı Qüvvələrində xidmət etmək arzusunu bildirib.

Digər tərəfdən, Ukrayna ədliyyə naziri Denis Malyuska “Financial Times” qəzetinə müsahibəsində Ukrayna hakimiyyətinin Prezident Volodimir Zelenskinin daha əvvəl imzaladığı məhbusların könüllü səfərbərliyi haqqında qanun sayəsində Ukrayna Silahlı Qüvvələri sıralarına təxminən 15 min nəfərin cəlb edilməsinin mümkün olacağını qeyd edib.

Qeyd edək ki, Zelenski məhbusların Ukrayna Silahlı Qüvvələri sıralarına səfərbər edilməsinə icazə verən qanunu mayın 17-də imzalayıb. Sənədə əsasən, yalnız milli təhlükəsizliyin əsasları əleyhinə və ya terrorizmlə bağlı cinayətlərə, iki və ya daha çox şəxsi öldürməyə, son dərəcə amansızlıqla adam öldürməyə, sərxoş vəziyyətdə bir neçə insanın ölümü ilə nəticələnən yol hərəkəti qaydalarını pozmağa görə məhkum olunmuş şəxslər səfərbərliyə məruz qalmayacaq. Həmçinin, istisnalara xüsusilə ağır korrupsiya cinayətlərində, hüquq-mühafizə orqanı əməkdaşının və ya hərbi qulluqçunun qətlinə görə məhkum olunmuş şəxslər də daxildir.

Xatırladaq ki, Ukrayna ədliyyə naziri uzun müddətdir ki, məhbusların səfərbər edilməsi ideyasını irəli sürüb. Eyni zamanda, o, ilkin olaraq bunun sayəsində əlavə 50 min nəfərin orduya cəlb oluna biləcəyini qeyd edib. Ancaq sonradan nazir proqnozlarını 20 min nəfərə endirib. Ədliyyə naziri onu da qeyd edib ki, ölkə hakimiyyəti Ukrayna Silahlı Qüvvələrinə səfərbərliklə bağlı çətinliklər və kadr çatışmazlığı ilə əlaqədar məhbusların hərbi xidmətə cəlb edilməsi haqqında qanun qəbul etmək qərarına gəlib.