Gürcüstan "3+3" platformasının İstanbul iclasında iştirak etməyəcək
Gürcüstan tərəfi oktyabrın 18-də İstanbulda Cənubi Qafqaz üzrə “3+3” platforması çərçivəsində keçiriləcək danışıqlarda təmsil olunmayacaq.
Bu barədə Gürcüstan Xarici İşlər Nazirliyinin mətbuat xidmətindən məlumat verilib.
“Biz (İstanbulda keçirilən 3+3 platformasının iclasında) iştirak etməyəcəyik. Gürcüstan çoxdan bəyan edib ki, o, göstərilən formatda işləmir”, - mətbuat xidmətinin əməkdaşı bildirib.
Qeyd edək ki, “3+3” platforması Cənubi Qafqaz regionunun altı ölkəsi (Rusiya, Türkiyə, İran, Azərbaycan, Ermənistan və Gürcüstan) arasında geniş əməkdaşlığı nəzərdə tutur.
Gürcüstan dəfələrlə bu formatda iştiraka dəvət olunub, lakin hələ də onun işinə qoşulmayıb.
Əvvəlki iki görüş 2021-ci ilin dekabrında və 2023-cü ilin oktyabrında müvafiq olaraq Moskva və Tehranda keçirilib.
