Vuçiç məğlub oldu - Serbiyada ələbələr qalib gəldi

Serbiyada 25 oktyabrda keçirilən növbədənkənar parlament seçkiləri hakimiyyət dəyişikliyi ilə nəticələnə bilər. Ölkənin keçmiş prezidenti Aleksandar Vuçiç rəhbərlik etdiyi siyasi qüvvənin seçkilərdə məğlub olduğunu etiraf edib.

Vuçiç bu barədə Serb Tərəqqi Partiyasının Belqraddakı seçki qərargahında açıqlama verib.

O bildirib ki, ilkin hesablamalara əsasən, tələbə hərəkatının dəstəklədiyi müxalifət seçki siyahısı parlamentdə 135–140, özünün rəhbərlik etdiyi “Aleksandar Vuçiç – Birləşmiş Serbiya” bloku isə təxminən 105 mandat qazanacaq.

“Yekun nəticələr hələ məlum deyil. Lakin mövcud məlumatlar göstərir ki, biz bu seçkiləri uduzmuşuq. Tələbələrin siyahısı qalib gəlib”, – Vuçiç bildirib.

Serbiyanın 250 yerlik parlamentində hökumət formalaşdırmaq üçün ən azı 126 mandat tələb olunur. İlkin nəticələr təsdiqlənərsə, tələbə hərəkatının dəstəklədiyi siyasi qüvvə təkbaşına hökumət qurmaq imkanı əldə edəcək.

Qeyd edək ki, Serbiyada tələbələrin rəhbərlik etdiyi kütləvi etirazlar 2024-cü ilin noyabrında Novi Sad şəhərində dəmir yolu vağzalının örtüyünün çökməsi nəticəsində 16 nəfərin həlak olmasından sonra başlayıb. Hadisə korrupsiya və dövlət idarəçiliyi ilə bağlı geniş narazılığa səbəb olub.

Təxminən iki il davam edən etirazlar sonradan geniş siyasi hərəkata çevrilib.

Xatırladaq ki, 2014-cü ildən Serbiyanın siyasi həyatında aparıcı mövqeyə sahib olan Vuçiç 2026-cı il sentyabrın 27-də prezident vəzifəsindən istefa verərək parlament seçkilərinə qatılıb.

Seçkilərin yekun rəsmi nəticələri hələ açıqlanmayıb.