Dinc ölkələr hesabatı - YAP-çı deputat Azərbaycanın 121-ci olmasına etiraz edir

2021-ci ilin Qlobal Sülh İndeksi açıqlanıb. Beynəlxalq təşkilat-İqtisadiyyat və Sülh İnstitutunun hazırladığı, daxili və xarici təhdidlər meyarlarına əsaslanan reytinqdə İslandiya, Yeni Zelandiya, Danimarka, Portuqaliya, Sloveniya, Avstriya, İsveçrə, İrlandiya, Çexiya, Kanada ən dinc 10 ölkə kimi göstərilir. Azərbaycan 163 ölkə arasında 121-ci yerdə qərar tutub.

Estoniya 30-cu, Latviya 35-ci, Litva 37-ci, Moldova 56-cı, Qazaxıstan 67-ci, Qırğızıstan 76-cı, Gürcüstan 89-cu, Özbəkistan 90-cı, Ermənistan 94-cü, Tacikistan 97-ci, Türkmənistan 109-cu, Belarus 117-ci, İran 141-ci, Ukrayna 142-ci, Türkiyə 149-cu, Rusiya 154-cüdür.

Siyahını Əfqanıstan qapayır.

Azərbaycan siyasi təbəddülatların, küçə nümayişlərinin, siyasi qarşıdurmaların yaşanmadığı ölkədir. Həm də artıq bir neçə ildir belədir. Qonşu Gürcüstan və Ermənistanda isə vəziyyət Azərbaycandan tam fərqlidir. Ölkədə stabil hökumətlər yoxdur, siyasi gərginliklər yaşanır. Amma biz siyahıda onlardan sonrakı yerləri tuturuq. Ona görə də bu cür hesabatların necə hazırlandığı sualı gündəmə gəlir. “Daxili və xarici təhdidlər meyarları”na görə Azərbaycan niyə bu cür riskli ölkə hesab olunsun? Beynəlxalq hesabatlarda niyə bizə münasibət bəzi hallarda qərəzlidir?

Hikmət Babaoğlu: “Çoxsaylı beynəlxalq təşkilatlar var ki, onlar ayrı-ayrı dövlətlər üzərində təzyiq aparatı funksiyasını yerinə yetirirlər”

Yeni Azərbaycan Partiyası İdarə Heyətinin üzvü, deputat Hikmət Babaoğlu “Yeni Müsavat”a bildirdi ki, Beynəlxalq  İqtisadiyyat və Sülh İnstitutunun hazırladığı, daxili və xarici təhdidlər meyarlarına əsaslanan reytinqdə Azərbaycanın  163 ölkə arasında 121-ci yerdə qərarlaşdırılması tamamilə bu təşkilatın subyektiv mövqeyi ilə əlaqədardır və əsla reallığı əks etdirmir: “Çoxsaylı beynəlxalq təşkilatlar var ki, onlar ilk baxışda müxtəlif sahələr üzrə ixtisaslaşmış, universal dəyərləri mənimsəmiş təşkilatlar kimi görünsələr də, əslində qlobal imperializmin ayrı-ayrı dövlətlər üzərində təzyiq aparatı funksiyasını yerinə yetirirlər. Eyni zamanda onlar əksər hallarda demokratiya və insan hüquqları kimi dəyərləri manipulyasiya edərək ona islamafob  eynəkdən baxırlar. Nəticədə də belə eybəcər və reallıqla uzlaşmayan təhrif olunmuş hesabatlar ortaya çıxır. Hesabatda Azərbaycana qarşı olan qərəz də elə buradan irəli gəlir. Azərbaycan 44 günlük Vətən müharibəsində Ermənistan üzərində şanlı zəfər əldə edib. Bu isə bütün islamafob dairələri olduqca narahat edir. Biz isə bənzər qərəzli münasibətlərə alışmışıq və ona qarşı mübarizə aparmağı da öyrənmişik”.

Fikrət Yusifov: “Ölkəmizin hesabatda geridə qalması bəzi qurumların fəaliyyətindəki nöqsanlardır”

İqtisadçı professor Fikrət Yusifov isə bildirdi ki, qonşu ölkələrlə müqayisədə ictimai-siyasi vəziyyətin yetərincə sabit olduğu Azərbaycanın Beynəlxalq İqtisadiyyat və Sülh İnstitutunun hazırladığı, daxili və xarici təhdidlər meyarlarına əsaslanan reytinqində Gürcüstan və Ermənistandan belə geridə qalması bir tərəfdən bizə olan ikili münasibətin nəticəsində yaranmış vəziyyətdirsə, digər tərəfdən bu cür qiymətin verilməsinə şərait yaradan bəzi qurumların fəaliyyətindəki nöqsanlardır: 

“Ölkədə elə məsələlər var ki, onları fərqli şəkildə həll edib beynəlxalq aləmdə də yüksək reytinqlər qazanmaq mümkündür. Necə oldu ki, biz Dünya Bankının ”Doing business" hesabatında  birdən-birə reytinqimizi yetərincə yaxşılaşdıraraq hətta Avropanın bir çox inkişaf etmiş ölkələrini geridə qoya bildik? Deməli, bu mümkündür. Deməli, əsasən iqtisadi müstəvidə baş verən islahatlara rəğmən aldığımız bu qiyməti digər müstəvilərdə də, o cümlədən hüquq müstəvisində də əldə etmək mümkündür. Ölkədə gerçək olan bir barış  mühitinin yaradılmasına ehtiyac duyulur. Bunu etmək mümkündür. Xüsusilə də İkinci Qarabağ müharibəsindən sonra bunu etmək mümkündür və gerçək olan budur ki, bunu etməyin vaxtı yetişib. Biz bunu edəriksə, o halda, belə reytinqlərdə də sürətlə irəliləyə biləcəyik. Bu cür hesabatlarda aşağı yerlərdə qərarlaşmağımız həm də ölkəmizə xarici şirkətlərin gəlməsinə və investisiya yatırımlarına da mənfi təsirini göstərir. Bu cür hesabatlarda hansı yerlərdə qərarlaşmağın həm siyasi, həm iqtisadi baxımdan əhəmiyyəti, təsirləri var".