Rüsumların artması vətəndaşa neçəyə başa gələcək? - Ekspert

Milli Məclisdə dövlət rüsumlarının qaldırılmasına dair təkliflərə baxılıb. Bu dəyişikləri Milli Məclisin İqtisadi siyasət, sənaye və sahibkarlıq komitəsi noyabrın 1-də keçirilən iclasında müzakirəyə çıxarıb.

"Dövlət rüsumu haqqında" qanuna təklif edilən dəyişiklərdə xarici pasportlardan tutmuş dərman preparatlarının dövlət qeydiyyatına alınmasına qədər müxtəlif rüsumların qaldırılması nəzərdə tutulur.

Bəs bu artımlar vətəndaşının xərclərinə nə qədər təsir göstərəcək?

Real partiyasının sədr müavini, iqtisadçı-ekspert Natiq Cəfərli bakupost.az -a bildirib ki, əgər təkliflər olduğu kimi plenar iclasda qəbul edilsə, bir çox istiqamətlərdə vətəndaşların xərcləri artacaq:

“Çünki rüsumların artırılması istər-istəməz son ünvan olaraq vətəndaşa təsir göstərir və vətəndaşın xərclərini artırır. Hansısa bir hesablama aparıb, ümumilikdə hər bir Azərbaycan vətəndaşına bunun nə qədər təsir göstərəcəyini söyləmək çətindir. Çünki spesifik məsələlər var. Məsələn, bir şəxs avtomobilinin sənədlərini və yaxud xarici pasportunu yeni alıbsa onlara rüsumların artımı həmin an təsir göstərməyəcək.

Əlbəttə, vətəndaşlar dövlət orqanlarında müəyyən sənədləşmə işlərini apararkən əlavə rüsum ödəmək məcburiyyəti yaranacaqsa, onların ciblərinə, xərclərinə çox təsir göstərəcək”.

İqtisadçı ekspert bildirib ki, bu işin fəlsəfəsi Azərbaycanda kökündən yanlışdır:

“Çünki müstəsna xidmət göstərən dövlət orqanları, yəni başqa heç bir yerdə eyni xidməti almağın mümkünsüzlüyünü nəzərə alaraq göstərdiyi xidməti ən azından maya dəyərinə göstərməyə çalışmalıdır. Dövlət burada pul qazanmaq, əlavə vəsait əldə etmək üçün qiymətləri artıra bilməz. Bu nöqteyi-nəzərdən təəssüf ki, Azərbaycanda bu fəlsəfi yanaşma tətbiq olunmur. Nəticə etibarı ilə müstəsna xidmət göstərən dövlət idarələri öz xidmət haqqını artıra bilirlər”.