Vidadi Muradovun ölümündən sonra dövlətə 22 milyonu kim ödəyəcək?
Məlum olduğu kimi, “Azərxalça”nın sabiq sədri, mərhum Vidadi Muradovun barəsində milyonlarlı mənimsəmə ittihamı ilə açılan cinayət işi üzrə məhkəmə araşdırması Bakı Ağır Cinayətlər Məhkəməsində davam etdirilirdi.
Təqsirləndirilən şəxs vəfat etdiyi halda cinayət işi hansı formada araşdırılır, necə qərar qəbul edilir?
"Azsiyaset" musavat.com-a istinadla xəbər verir ki, əgər təqsirləndirilən şəxs vəfat edərsə, məhkəmə onun vərəsələrinə bu barədə məktub göndərir ki, yaxın qohumlarından kimsə onun hüquqi varisi kim tanınsın.
Həmin şəxslərdən kimsə hüquqi varis kimi tanındıqdan sonra o şəxsin hüququ var ki, razılıq versin və cinayət işi xətm edilsin. Bu zaman cinayət işinə xitam verildikdə bəraətverici əsas olmadan mərhum şəxs təqsirləndirilir. Vəfat etdiyi üçün ona cəza təyin edilmir. Ya da hüquqi varisin hüququ var ki, tələb işin sona qədər araşdırılmasını, mərhumun günahının olub-olmamasının müəyyən edilməsini tələb etsin.
Hazırkı cinayət işi üzrə tanınmış zərərçəkmişlərə zərərin ödənilməsinə gəlincə, Mülki Məcələnin tələblərinə əsasən ölmüş şəxsin vərəsələri mərhumun mirası həcmində məsuliyyət daşıyırlar. Əgər mərhumun hansısa əmlakına həbs qoyulubsa, həmin əmlak zərərin ödənilməsinə yönəldilə bilər.
Xatırladaq ki, V.Muradov 21 milyon 673 min manat məbləğində pul vəsaitini mənimsəməkdə ittiham olunur.
V.Muradovun qeyd olunan vəzifədə işləyərkən təsisçisi olmaqla faktiki rəhbərliyini həyata keçirdiyi “Azər-İlmə” MMC-nin Bakı şəhəri ərazisində yerləşən inzibati binasının “Azərxalça” ASC-yə mövcud bazar qiymətlərindən yüksək qiymətə icarəyə verilməsi, “Azərxalça” ASC-yə məxsus pul vəsaitinin xalça istehsalı üçün nəzərdə tutulan ipin alınmasına görə formal müqavilənin bağlanması yolu ilə ayrı-ayrı hüquqi şəxslərə məxsus bank hesablarına köçürülərək sonradan nağdlaşdırılması, ölkə ərazisində tikintisi həyata keçirilmiş 23 müəssisə üzrə smeta sənədlərində iş həcmlərinin və qiymətlərin əsassız olaraq şişirdilməsi, işlərin daha ucuz və keyfiyyətsiz işlərlə əvəz edilməsi və ya yerinə yetirilməməsi və digər qanunsuz üsullarla ona etibar edilmiş ümumilikdə 21 milyon 673 min manat məbləğində pul vəsaitini mənimsəmə və israf etmə yolu ilə talaması, habelə xüsusilə külli miqdar təşkil edən cəmi 640 min manat məbləğində vergiləri dövlət büdcəsinə ödəməkdən qəsdən yayınması, vəzifə səlahiyyətlərindən sui-istifadə etməsi və vəzifə saxtakarlığına yol verməsinə əsaslı şübhələr müəyyən edilib.
Ona qarşı Cinayət Məcəlləsinin 179.4 (mənimsəmə və ya israf etmə- xüsusilə külli miqdarda ziyan vurmaqla törədildikdə), 213.3 (vergiləri ödəməkdən yayınma- xüsusilə külli miqdarda törədildikdə), 308.2 (vəzifə səlahiyyətlərindən sui-istifadə etmə- ağır nəticələrə səbəb olduqda) və 313-cü (vəzifə saxtakarlığı) maddələri ilə ittiham elan edilərək məhkəmənin qərarı ilə barəsində həbs qətimkan tədbiri seçilib və cinayət işi baxılması üçün Bakı Ağır Cinayətlər Məhkəməsinə göndərilib.
Xatırladaq ki, Vidadi Muradov və onun ailə üzvlərinin adlarına olan ümumi dəyəri 30 milyon 587 min manat təşkil edən yaşayış və qeyri-yaşayış sahələri, habelə “Azər-İlmə” MMC-nin səhm paylarının və aktivlərinin üzərinə məhkəmə qərarı ilə həbs qoyulub.
Bildirək ki, onkoloji xəstə olan V.Muradov səhhəti ilə bağlı azadlığa buraxılandan bir neçə gün sonra vəfat edib. Yaxın günlərdə onun cinayət işi üzrə hüuqi varisin tanınacağı. Məhkəmə araşdırmasnın davam etdiriləcəyi gözlənilir.
