"İstər dövlət, istər özəl televiziyalarımız bu məsələdə həvəskar kimi davranırlar" - Zeynal Məmmədli
Ölkədə baş verən hər hansı ekstrimal hadisələr zamanı televiziyalarımızda heç bir dəyişiklik nəzərə çarpmır. Ötən gün Xızıda helikopter qəzası zamanı şəhid olan 14 hərbçimizin xəbəri hər kəsi məyus etsə də televiziyalarımızda çal-çağır proqramları dayandırılmadı.
"Azsiyaset" xəbər verir ki, mövzu ilə bağlı Moderator.az-a danışan media eksperti Zeynal Məmmədli xəbər aparıcılarımızın bu cür xəbərləri çatdırarkən dediklərini dərk etmədiklərini bildirib:
“Əsas diqqət xəbərin necə çatdırılmasına yönəlməlidir, nəinki efirdə nümayiş olunan çal-çağır verilişlərinə. Aparıcı xəbəri elə şəkildə təqdim etməlidir ki, şəhidlərin doğmalarının könlü inciməyə. Belə məqamda aparıcı hansı səs tonu ilə xəbəri çatdırması, jesti, mimikaları önəm kəsb edir. Şəhid xəbəri çatdırıldıqda aparıcı gülümsəməməlidir. Dünən əksər xəbər proqramlarını izlədikdə isə bu hadisəni təqdim edən xəbər aparıcılarının umursamazlıqlarının şahidi oldum. Soyuqqanlı, saymazyana və umursamaz şəhid xəbəri çatdırmaq nə qədər qənaətbəxş hesab edilir? Sanki məcburi şəkildə işlərini görürlər. Xəbəri çatdırarkən onun intonasiyası, necə çatdırılması önəmlidir. Bu tipli xəbərlərin çatrılması ilə bağlı xəbər proqramlarında qeyri peşkarlıqlar var. O, ki, qaldı matəm verilişlərinə, ölkədə matəm elan olunmayıbsa, televiziyalar o proqramları saxlamırsa burada qəbahət yoxdur. Əsas məsələ proqram arasında hansı xüsusi materialların təqdim edilməsidir. Heç olmasa bunu etməlidirlər. İstənilən televiziyalarda bu cür hallarala bağlı yaddaşlar olmalıdır. Bunlar daxili razılaşdırılmış qaydalardır. Bizim televiziyalarda bu yoxdur. Bu birbaşa qeyri-peşəkar davranışlardır. İstər dövlət, istər özəl televiziyalarımız bu məsələdə həvəskar kimi davranırlar. Özlərini müştərinin başında dəlləlik öyrənən bərbər kimi aparırlar. Sanki peşəkar davranışları da tamaşaçının başında öyrənirlər. Bizim televiziyalar təəssüf ki, bunu xatırladır. Televiziyalar cəmiyyətə nəyi vermək istəyir? Onların işçiləri, aparıcıları bu itkinin nə olduğunu izah edə bilirmi? Axı düşünmürlər ki, bir pilotun, peşəkar polkovnikin yetişdirilməsi uzun zaman və təcrübə deməkdir. Bunu dərk etmək lazımdır. Bunu dərk etməyəndə yanaşma da belə olur. Çox təəssüf”.
