"Müharibə Minsk qrupunun uğursuzluğu idi"  - Fransalı ekspert

“Beynəlxalq ictimaiyyətin əksəriyyəti Azərbaycanın ərazi bütövlüyünü və Qarabağdakı suverenliyini tanıyır və dəstəkləyir”.

"Azsiyaset" bu sözləri yenisabah.az-a açıqlamasında “Sosial Elmlərdə Fənlərarası Tədqiqatlar Mərkəzi”nin direktoru, fransalı siyasi ekspert Naim Asas deyib.

O, BMT tərəfindən qəbul edilən qətnamələri xatırladıb:

“1993-cü ildə BMT TŞ tərəfindən qəbul edilmiş 822, 853, 874 və 884 saylı qətnamələr var. Azərbaycan və Ermənistan bütün problemləri həll etmək üçün hər hansı bir həll yolu tapmalıdır. ATƏT-in Minsk qrupunun Azərbaycanla Ermənistan arasındakı münaqişənin həllində qərəzli olduğu görünür. Müharibə Minsk qrupunun uğursuzluğu idi. Buna görə də, onlar münaqişənin BMT qətnamələri əsasında həlli üçün danışıqlar aparmalıdır. Prezident İlham Əliyev və Ermənistan Baş naziri Nikol Paşinyanın iştirakı ilə müxtəlif liderlərlə çoxlu görüşlər keçirilib və regionda gərginliyin azaldılması və etimadın yaradılması səylərini dəstəkləmək əzmində olduqlarını bir daha təsdiqləyiblər. Onlar müxtəlif məsələlər, o cümlədən məhbusların azad edilməsi, itkin düşmüş şəxslərin axtarışı üzrə birgə səylərin davam etdirilməsi, eləcə də dəmir yollarının bərpası üzrə görülən işləri qiymətləndiriblər”.

Mütəxəssis qeyd edib ki, bütün bu görüşlər Brüsselin sülh gündəliyinin davamı olub:

“Tərəflər iki ölkə arasında münasibətlərin müxtəlif aspektlərini, o cümlədən humanitar məsələlər, etimad quruculuğu tədbirləri, Azərbaycanın üzləşdiyi mina problemi, kommunikasiyaların açılması, sərhədlərin delimitasiyası və demarkasiyası, eləcə də, sülh müqaviləsi üzrə danışıqları müzakirə ediblər. Ermənistan itkin düşənlərin və kütləvi məzarların tapılması üçün əməkdaşlıq etməlidir. Atəşkəs razılaşmasından sonra ölənlər olduğu üçün iki ölkə sərhədində gərginlik davam edir. Atəşkəs rejiminə hörmət etmək və nəticədə sülhə nail olmaq üçün iki ölkənin liderləri digər tərəfdaşların təşəbbüsü olmadan bir araya gəlməlidir. Baş nazir Paşinyan və Prezident Əliyev bu razılaşmanın əsasıdır və onlar həm də sülh alovunun daşıyıcıları olmalıdırlar. Prezident Əliyevlə Baş nazir Paşinyan arasında Soçi görüşündən bəri məqsəd gərginliyi azaltmaq və daha dərin böhrandan qaçmaqdır. Hesab edirəm ki, onlar ilk növbədə əsas prinsiplər üzrə razılığa gəlməlidirlər”.