Azərbaycanda maliyyə cinayətkarları kimlərdir?

Ötən gün adına şirkət qurulduğunu öyrənən Astara rayon Toradi kənd sakini Zaur Sovqatov intihar edib. Bildirilir ki, ölümündən bir neçə gün öncə mərhum Zaur Sovqatov aldadıldığını, onun adına bir neçə şirkət yaradıldığı və böyük məbləğdə vergi borcu yarandığı barədə hüquq-mühafizə orqanlarına və digər dövlət qurumlarına müraciət edibmiş.

Bu, Azərbaycanda maliyyə cinayətkarlarının mütəşəkkil şəkildə fəaliyyətinin olduğunu deməyə əsas verirmi? Onlardan necə qorunmalı?

"Azsiyaset" xəbər verir ki, məsələ ilə bağlı deputat Musa Quliyev bakupost.az -a açıqlama verib.

Bildirib ki, bunlar fərdi şəkildə fəaliyyət göstərən dələduzların işidir:

“Ölkədə böyük maliyyə cinayətkarlığı ilə məşğul olan mütəşəkkil qruplaşmaların olduğunu düşünmürəm. Fərdi dələduzlar hər zaman olub, indi də var. Lakin həmin dələduzlar vətəndaşlarımızın sadəlövhlüyündən, savadsızlığından yararlanaraq, həmçinin onları şirnikləndirərək belə addımlar atırlar”.

Onun sözlərinə görə polis, maliyyə orqanları tərəfindən, eyni zamanda mətbuat vasitəsilə davamlı maarifləndirmə işləri aparılmalıdır:

“İnsanlar bilməlidir ki, bu imzanı niyə atır, sabah hansı problemlərlə qarşılaşa bilər və yaxud şəxsi sənədini kiməsə həvalə etmək olmaz. Bunların qarşısını hər hansı bir qanunla almaq mümkün deyil. Lakin bu tip dələduzlara qarşı kifayət qədər qanunlar qəbul olunub. İstər cinayətkarlıqla bağlı, istər maliyyə pozuntuları, istərsə maliyə saxtakarlıqları ilə bağlı qanunlarımızda müddəalar da mövcuddur. Lakin burada vətəndaşlarımızın savadlılığı vacibdir. Hər kəsin yanına polis qoya bilmərik ki, vətəndaşın haqqını qorusun”.

Millət vəkilinin fikrincə indi kibercinayətlər hədsiz çoxalıb:

“Vətəndaşların bank kartlarındakı məlumatları oğurlayaraq onların bank hesablarındakı pullarını çəkirlər. Eyni zamanda müxtəlif ölkələrdən vətəndaşlarımızı şirnikləndirərək onların pullarını almaq halları da var. Belə hallarda vətəndaşların ayıq-sayıqlılığı lazımdır”.

M.Quliyev qeyd edib ki, belə dələduzları həbslər gözləyir:

“Belə dələduzlar 8, 10, 12 ilə qədər həbs oluna bilərlər. Lakin dələduzun cəzalandırılmasının zərərçəkmiş vətəndaşa xeyri olmayacaq. Bəzi vaxtlarda məhkəmə qərar çıxarır ki, vətəndaşa dəymiş ziyan ödənilsin. Bu da çox nadir hallarda icra olunur. Çünki cinayətkarlar adətən öz adlarında nə mülk, nə pul saxlayırlar. Onu da qeyd edim ki, “Asan İmza” qorunur və hər bir vətəndaşın “Asan İmza”sı yoxdur. “Asan İmza” daha çox sahibkarlıq fəaliyyəti ilə məşğul olan insanlarda olur. Digər hallarda isə, görünür, saxta sənədlər əsasında nələrsə hazırlanır. Hər halda bütün bunları hüquq-mühafizə, vergi, maliyyə orqanları mütləq araşdırmalıdır”.