Massajist-müğənni: "Çörək qazanmaq üçün başqa sahələrə baş vurmaq lazımdır" - MÜSAHİBƏ
İllər öncə tamaşaçıya musiqi yarışmalarından ifaları ilə tanış olan, qısa zamanda sevilən və akademik musiqi seçimlərinə görə fərqlənən Şəhla Həmidova son illər səhnədən uzaq düşdü. Bir müddət öncə onu yenidən televiziya kanalında görmək, ifasını eşitmək, əminik ki, savadlı musiqiyə dəyər verən hər bir tamaşaçı üçün xoş oldu.
Biz də Demokrat.az saytı olaraq Şəhla Həmidova ilə həmsöhbət olduq, ona suallarımızı ünvanladıq...
- Şəhla xanım, müsabiqə vaxtı güclü səs tembri ilə fərqlənirdiniz. Sizi səhnədən uzaq salan səbəb nə oldu?
- O qədər şeylər gördüm, anladım ki, adı kimi incə olan sənətdən əsər-əlamət qalmayıb. Hara gedirdinsə, qarşında maneə görürdün. Səhnədə qalmaq üçün ya gərək abırsız olasan, ya da arxa, köməyin olsun. Yəni, artıq sənət tamaşaçıya maraqlı deyil. Kim harda, necə oxudu, nə oxudu, heç maraqlanan yoxdu. Yetişən nəslin mənəvi zövqü necə olacaq, bilmirəm. Baxdım ki, səhnədə qalmaq üçün lazım olan tələblər məndə yoxdur. Mənim ifam, mənim performansım indiki tamaşaçıya maraqlı deyil. İndi, sanki, incəsənətimiz ilan-qurbağa mahnılardan ibarətdir. Elə bil ki, bu mahnıları insanların beyninə hopdurublar, hara getsən o mahnıları eşidirsən. Mənim ifalarım o dırnaqarası trendə düşə bilmədi. Ona görə də istər-istəməz uzaqlaşdım.
- Sizcə, uğurlu ifaçı olmaq üçün səsdən başqa nə lazımdır?
- Uğurlu ifaçı olmaq üçün insanda gərək şans ola. Bir də gərək sponsor ola- arxanda dayanacaq adamın.
- Yenidən səhnəyə qayıtmağınıza kim və ya nə səbəb oldu?
- Pandemiya göstərdi ki, insanın səhnədən başqa da işi olmalıdır. Çörək qazanmaq üçün başqa sahələrə də baş vurmaq lazımdır. Amma səhnəyə qayıtmağıma səbəb ATV kanalı səbəb oldu. Sağ olsun Nanə xanım, Zaur bəy məni dəvət etdilər. Vüqar bəy çəkdi məni. Sənətə həvəsim ölmüşdü, onlar həvəsimi geri qaytardı,sanki. Onların dəvətindən sonra mən bir çox məclislərə, banketə dəvət olundum. Sənət adamı da başqa hardan qazanc əldə edə bilər?! Mənim konsert etməyə imkanım yoxdu, ancaq elə məclislərdən qazandığım pulla dolana bilərəm. Onlara dönə-dönə təşəkkür edirəm. Özümdə yenə də güc tapdım, səhnəyə qayıtdım, nə qədər davam edə bilərəm, bilmirəm.
- Nələr üçün "gecdir artıq" deyirsiniz?
- Bilsəydim ki, musiqimiz bu vəziyyətə qalacaq, ifaçı olmaq barədə düşünməzdim. Ya da çalışardım ki, sənəti bu qədər sevən, dərinliyinə qədər bilən ifaçı olmazdım. İndi necə gəldi oxuyurlar, mən də onlar kimi olardım. Amma daha gecdi, özümü dəyişə bilmərəm. Bivec olmaq istəyərdim, bunun üçün də gecdir artıq. Mən və mənim kimi insanlar üçün nəinki sənət, həyat özü də çətindir.
- Səhnə vəfasızdır, deyirlər. Bəs niyə onu sevirlər?
- İnsan öləcəyini bildiyi halda, əzmlə vuruşur. Bir maşınla kifayətlənmir, üç maşın alır, evlər, mal-mülklər, amma əslində, hər kəs 2x1 yerə gedirik də.. Mənim ən böyük arzum odur ki, böyük səhnədə konsertlə çıxış edim. Amma onu da bilirəm ki, həyat kimi səhnə də vəfasızdır. Necə ki, vəfasız olduğu halda həyatı da sevirik, səhnə də elədir. Kiminsə yaradıcılıq gecəsi olanda, dəvətlilər içərisində mən də olanda, elə təsəvvür edirdim ki, mənim konsertimdir. Səhnə həvəsimi, oxumaq tələbatımı elə ödəyirdim. Hər kəs gərək vaxtında səhnədən getməyi bacarsın. Gərək səhnədən gedəndə də gözəllik qoyub gedəsən, yaddaşlarda yaxşı qalasan.
Maya Həsənova
Demokrat.az
