Nə Rusiya, nə də Ukrayna istəyinə nail oldu - Putinin məqsədi nədir? - ŞƏRH
“Qısa zamanda Rusiya ilə Ukrayna arasında ilkin razılaşmalar olacaq”.
Bu sözləri keçmiş xarici işlər naziri, politoloq Tofiq Zülfüqarov bakupost.az -a açıqlamasında qeyd edib.
O, razılaşmalar üçün təşkil olunacaq görüşlərdə hansı məsələlərin müzakirə olunacağına diqqət çəkib:
“Onlayn rejimdə görüşlərin keçirildiyi haqda məlumatlar var. Nümayəndələr artıq gələcək ilkin razılaşmalar barədə fikir mübadiləsi aparırlar. Ukrayna rəsmiləri də bu görüşlərin müəyyən ölkələr vasitəsilə həyata keçirildiyini qeyd edib. Atəşkəsin bərpa olunması, qoşunların hansı hissələrə yerini dəyişməsi və çəkilməsi danışıqlar mövzusudur. Ukrayna 23 fevraldakı vəziyyətə qayıtmağı tələb edəcək. Amma Rusiya da görüşlər vaxtı öz tələblərini səsləndirəcək. Ukraynanın gələcək neytral statusu ilə bağlı ümumi fikirlərin səslənməsi də istisna deyil. Artıq hərbi əməliyyatlar barədə elə də önəmli məlumat yoxdur. Sanki nəyisə gözləyirlər. Rusiya Xarkov və Kiyev kimi şəhərləri mühasirəyə alıb, lakin ora hücum etməyə cəhd göstərmir”.
T.Zülfüqarov düşünür ki, ilkin razılaşmanı hər iki tərəf özünün qələbəsi kimi göstərəcək:
“Bu, siyasətçilərin adətidir. Amma müharibə geniş şəkildə Rusiyanın imicinə, iqtisadiyyatına, daxili siyasətinə ciddi zərbə vurur. Mən bunu dərin böhran adlandırıram. Müharibə nəticəsində Rusiyanı ciddi dəyişikliklər gözləyir. Hər iki ölkənin daxili qüvvələri qələbəni tənqid edəcək. “Razılaşmalar olacaqdısa, müharibə nəyə lazım idi?”, “Müharibədən öncə şərtləri qəbul edərdilər” kimi deyimlər olacaq. Müharibədə siyasi baxımdan nəsə əldə etmək mümkün olmadı. Burada mütləq siyasi günahkar olmalıdır. Biz də 30 ildir ki, məsələni həll etməyə cəhd edirdik, ermənilər imkan vermirdi. Amma biz buna nail olduq. Ukrayna isə bu müharibə nəticəsində öz istəklərinə nail ola bilmir, eləcə də Rusiya”.
Politoloq sülhməramlı missiyaların işə düşəcəyi ehtimallarından da danışıb:
“Ukraynada ATƏT-in müşahidəçi missiyası mövcud idi. Ukrayna Minsk qrupu çərçivəsində 3-4 ölkə ilə danışıqlar keçirib. Müşahidəçilər buradan əldə olunan razılaşmalara nəzarət edirdilər. Düşünürəm ki, hazırkı vəziyyətdə də bu strukturdan istifadə edəcək. Sülhməramlılar səviyyəsində nəzarətə Rusiyanın razı olacağına inanmıram”.
