Azərbaycan dövləti rəsmi qurumları media ilə işləməyə çağırır - İslahatların növbəti bəhrəsi
Mediamız uzun illərdir ki, dövlət qurumları ilə təmasların qurulmasından əziyyət çəkir. Bəzən gündəmin ən əhəmiyyətli mövzusu ila bağlı rəsmi qurumların vaxtında reaksiya verməməsi əlavə manipulyativ iddiaların peyda olmasına yol açır.
Sosial, yaxud iqtisadiyyatla, eləcə də digər sahələrlə bağlı hadisə baş verir, yaxud hansısa iddia irəli sürülür, rəsmi qurumlar həqiqəti açıqlayana qədər bu iddialar tirajlanır, daha kütləvi hal alır. Real məlumatın gec açıqlanması isə artıq heç bir effekt vermir.
Bu məsələdə ən çox çətinliyi çəkən mediamızdır. Çünki medianın işi baş verən hadisəni araşdırmaq və həqiqəti ortaya çıxarmaqdır. Rəsmi qurumların, mətbuat katiblərinin bəzən laqeyd münasibəti, yaxud qeyri-operativliyi medianı çətin vəziyyətə salır. Bu kimi hallar məhz sosial şəbəkələrdəki iddiaların peşəkar medianın önünə keçməsinə, həqiqətin yox, iddiaların geniş yayılmasına gətirib çıxarır. Dəfələrlə maraqlı qrupların baş verən istənilən hadisəni siyasi manipulyasiyaya çevirdiyinin, birbaşa dövləti hədəfə aldığının şahidi olmuşuq.
Yeganə çıxış yolu dövlət qurumlarının media ilə daha sıx işləməsinə nail olmaqdır. Dövlətin media siyasəti və bu sahədə həyata keçirilən son islahatlar artıq dövlət qurumları ilə jurnalistlər arasında keçmişdə yanmış olan körpülərin bərpasını göstərir.
Artıq son dövlər bu istiqamətdə irəliləyişlərin olduğunu görürük. Bu, iki məsələdən irəli gəlir:
- Birincisi, Azərbaycan dövlətinin media siyasətidir. Dövlət manipulyativ informasiyaların tirajlanmasında maraqlı deyil. Bu baxımndan, Prezident İlham Əliyevin genişmiqyaslı islahatlar paketinə daxil olan media islahatlarının məqsədi də məhz Azərbaycan mediasının inkişafı ilə yanaşı, dövlət-media münasibətlərinin də yaxşılaşmasına hesablanıb.
- İkincisi, dövlət başçısının yeni media siyasətinin nəticəsi olaraq yaradılan MEDİA Agentliyinin fəaliyyətidir. Agentlik artıq dövlət qurumlarının mətbuat xidmətlərinə mütəmadi olaraq seminarların keçirilməsini həyata keçirir. Məqsəd məhz dövlət-media münasibətlərinin qurulması, feyk xəbərlərin yayılmasının qarşısının alınması, eyni zamanda, peşəkar medianın inkişafıdır.
MEDİA Agentliyinin ADA Universitetinin birgə imzaladığı əməkdaşlıq memorandumu çərçivəsində “Media və kommunikasiya siyasəti medianın gözü ilə” mövzusunda həyata keçirdiyi seminarlar prosesin praktiki mərhələdə həyata keçirildiyini təsdiqləyir. Seminarlar dövlət sektorunda fəaliyyət göstərən qurumların mətbuat xidmətlərinin rəhbərləri, ictimaiyyətlə əlaqələr üzrə məsul əməkdaşları üçün aparılır. Məqsəd dövlət orqanları (qurumları) ilə media subyektləri arasında əməkdaşlıq münasibətlərinin möhkəmləndirilməsinə şərait yaratmaq, qarşılıqlı etimadın artırılması ilə əlaqədar tədbirlər həyata keçirməkdir.
Bu kimi tədbirlər və son dövrlər müsbətə doğru dəyişən mənzərə isə dövlətimizin media siyasətinin səmərəliliyinə nümunədir!
Vasif Həsənli
"Demokrat.az" xəbər portalının baş redaktoru
