Lukaşenko sona qədər müqavimət göstərəcək: Putin Belarusa niyə gedir? - "ISW"
Məlum olduğu kimi, bu günlərdə Vladimir Putinin Belarusa səfəri gözlənilir. Səfərin məqsədi ilə bağlı müxtəlif versiyalar səsləndirilməkdədir.
ABŞ Müharibə Araşdırmaları İnstitutunun(ISW) mütəxəssislərinin fikrincə, Putinin Belarus səfərinin əsas məqsədi Aleksandr Lukaşenkonu Rusiya ilə inteqrasiya məsələlərində daha çox güzəştlərə vadar etməkdir. Yəni, Rusiya başçısı Belarusun öz suverenliyini Rusiya ilə birgə yaradılan “İttifaq dövləti”nə qurban verməsini istəyir.
Lakin Lukaşenko artıq səfər öncəsi açıqlamaları ilə bu prosesə boyun əyməyəcəyinin siqnallarını verib. Belə ki, Belarus Prezidenti son açıqlamasında öz hakimiyyətini nəzərdə tutaraq, “Belarusu bizdən başqa heç kim idarə etmir”, -deyə bildirib. O, deyib ki, Rusiya ilə sıx əlaqələrin tərəfdarıdır, lakin bu zaman mütləq “Belarusun suveren və müstəqil dövlət olduğundan” çıxış etmək lazımdır.
İnstitutun ekspertləri Putinin səfərini həmçinin, son zamanlar Rusiyanın yenidən Kiyevə hücuma hazırlaşdığına dair aparılan informasiya əməliyyatı ilə əlaqələndirir. Belə ki, Putinin bu səfəri Rusiyanın doğrudan da belə bir niyyətdə olduğuna dair qənaəti gücləndirməyə xidmət edir. Bu yolla Ukraynaya və Qərbə təzyiq göstərilir ki, Zelenski haklimiyyəti gözlənilən hücumdan çəkinərək, güzəştə getsin və danışıqlar masasına otursun.
Lakin amerikalı ekspertlər və eləcə də bir çox müstəqil müşahidəçilər bu təzyiqlərin lazımi effekt verməyəcəyi qənaətindədirlər. Onlar hesab edirlər ki, Belarus Prezidenti nə yolla olursa olsun, öz ordusunun Ukraynaya qarşı savaşa qoşulmasına imkan verməyəcək. Çünki ən azından bu, onun öz hakimiyyət maraqlarına uyğun deyil. Digər yandan, Belarus ordusunun və xalqının böyük hissəsi ölkənin bu müharibədə iştirakının əleyhinədir. Ona görə də amerikalı ekspertlər hesab edirlər ki, Lukaşenko Belarus ordusunun nə müstəqil şəkildə, nə də Rusiya ordusu ilə birgə Ukrayunaya qarşı hücumda iştirakına tərəfdar deyil və sona qədər Putinin təzyiqlərinə müqavimət göstərəcək.
ISW mütəxəssislərinin fikrincə, Rusiya hakimiyyəti Qərbdə belə bir qənaət yaratmağa çalışır ki, Ukraynaya qarşı hərbi güc tətbiqini daha da gücləndirəcək və Ukrayna Ordusunun cəbhə xəttində hansısa irəliləyiş əldə etməsi artıq qeyri-mümkündür, vəziyyət dalana dirənib və sair. Lakin institutun mütəxəssisləri qeyd edirlər ki, bu hesablamalar yanlışdır və Ukrayna işğal olunmuş ərazilərin əhəmiyyətli hissəsini qaytarmaq iqtidarındadır.
