Xaricdən benzin idxalı 4,7 dəfə artıb, qiyməti isə 4 qəpik aşağı düşüb
Bu ilin yanvar-fevral ayları ərzində Azərbaycana xarici ölkələrdən 40 min 878 ton "Aİ-92" markalı ("Regular") benzin idxal edilib.
Azərbaycanın xaricdən idxal etdiyi "Aİ-92" markalı benzinin 1 litrinin orta gömrük dəyəri 59 sent (1 manat) olub.
Məlumat üçün bildirək ki, Azərbaycan "Aİ-92" markalı benzini 3 ölkədən – Rusiya, Rumıniya və Belarusdan idxal edib:
- Rusiyadan – 37 min 149 ton (1 litri – 1 manat)
- Rumıniyadan – 3 670 ton (1 litri – 1 manat 5 qəpik)
- Belarusdan – 58,5 ton (1 litri – 1 manat 11 qəpik)
Müqayisə üçün bildirək ki, ötən ilin eyni dövründə Azərbaycan builkindən 4,7 dəfə az – 8 min 772 ton "Aİ-92" markalı benzin idxal edib. Ötən ilin ilk iki ayında benzin yalnız Rusiyadan alınıb və bu ölkədən gətirilən benzinin 1 litrinin orta gömrük dəyəri 1 manat 4 qəpik olub.
Onu da qeyd edək ki, ötən ilin 1 iyul tarixindən etibarən Azərbaycanda "Aİ-92" markalı benzinin qiyməti 1 manatdan 1,10 manata qaldırılıb.
