"Daş atırsan siyasətçiyə dəyir, amma bircə ideoloq yoxdur" - Mirmahmud Mirəlioğlu deputatın cavabını verdi

Bir neçə gün əvvəl vaxtilə AXC fəallarından olmuş Böyük Qurtuluş Partiyasının sədri Fazil Mustafa zamanında eks-prezident Əbülfəz Elçibəyin ətrafında olan şəxslərə qarşı bu gün cəmiyyətdə hökm sürən qərəzli münasibətdən söz açıb.

Deputat qeyd edib ki, siyasətdə Əbülfəz Elçibəyin 30 il öncə səsləndirdiyi bütün fikirlərin təkrarlanması kimi bir tələb yoxdur. İnsanlar bilməlidir ki, müstəqillik, demokratiya kimi ümumi ideyalar təkcə Elçibəyə yox, ölkəsinin inkişafına önəm verən hər kəsə məxsusdur.

“Kim Azərbaycanın xeyrinə fəaliyyət göstərirsə, siyasət anlayışı varsa, Azərbaycanın inkişafına yardım edirsə, Elçibəyin ideyasını həyata keçirir deməkdir. Kim nə bilir, bəlkə də, Elçibəy indi sağ olsaydı, bəzi fikirlərindən özü imtina edərdi. Siyasəti əqidə məsələsinə çevirməkdən böyük axmaqlıq yoxdur”,- deyə millət vəkili modern.az-a açıqlamasında bildirib.

Mərhum AXC sədrinin müasir dövrümüzlə səsləşməyən, redaktəyə ehtiyacı olan hansısa fikirləri varmı?

Azsiyaset.com mövzu barədə yenisabah.az-a danışan Klassik Xalq Cəbhəsi Partiyasının sədri Mirmahmud Mirəlioğlu hesab edir ki, zaman gələcək Elçibəyin bu gün qəbul olunmayan, tənqidə məruz qalan, hətta anlaşılmayan bütün ideyalarının öz təsdiqini tapacaq:

“Düzü, bu və ya digər açıqlamalara münasibət bildirməyi doğru hesab etmirəm. Yəni kimsə hər hansısa bir fikir səsləndirə bilər. Deməli, o, belə düşünür. Ümumilikdə, Elçibəy ideologiyasına gəldikdə, bugünkü bəzi qafalar onların hamısını qəbul eləmək gücündə deyil. Bu, Azərbaycanın, Türk dünyasının bütövlüyü ideologiyasıdır. 44 günlük müharibə bir çox şeyi təsdiq elədi. Bəzən bu və ya digər məsələlərə münasibət bildirərkən sadəcə o şüarların zahiri görkəminə fikir veririk, mahiyyətə yox. Bu isə Azərbaycanda ideoloqların olmamasının göstəricisidir. Buna Əbülfəz Elçibəy belə cavab verirdi: “Mən həm inqilabçı, həm siyasətçi, həm müəllim, həm də ideoloqam”. O, həqiqətən, mübarizə aparırdı. Bu, təkəbbür demək deyil. Bu, Azərbaycan siyasi səhnəsində, dövlətçilik ərkanında boşluğun göstəricisi idi”.

Mirmahmud Mirəlioğlu vurğulayıb ki, Azərbaycanda hamı siyasətçi oldu, amma siyasətçilər yetişmədi:

“Əsl siyasətçi yetişdirmək çətindir, bir günün işi deyil. 200 illik köləlik dövrü – çar Rusiyası, sovet Rusiyası var. Keçmiş SSRİ məkanında əgər bütün xalqların, respublikaların rəhbərləri həmin ölkənin öz adamıydısa, Azərbaycanda bu, belə deyildi. Başlanğıcda bütövlükdə gürcü və erməni vardı. Sovet İttifaqının rəhbərliyində Moskvada erməni və gürcülər vardı. Bunların heç biri təsirsiz ötüb keçməyib. Bir də ki milli, insani məsələlər kimin hansı status sahibi olmasından asılı olmayaraq, hər adamın işi deyil. 

Məsələlərə bir mövsümi, bir də fundamental münasibət bəsləmək var. Azərbaycanın bütövlüyü məsələsi hər oğulun və xanımın işi deyil. İndi hər kəs istəyir özünün yaşadığı zamanda nəyəsə nail olsun. Amma ideoloq deyir ki, mən olmasam da, milli ideya, dövlətçilik ideyası yaşamalıdır, bizsiz də dünyanın işi keçər”.