İstanbul görüşü nəyi dəyişəcək? - Rusiyalı politoloq
"Rusiya öz mövqeyindən geri çəkilmir və çəkilməyəcək. Rusiyanın tələbləri Ukraynanın demilitarizasiya və denasifikasiyası, rus dilinin ikinci dövlət dili kimi status əldə etməsi, “Donetsk və Luqansk Xalq Respublikaları”nın tanınması, Krımın və Sevastopolun Rusiyanın ərazisi kimi qəbul edilməsi, Ukraynanın heç bir hərbi bloka, xüsusilə NATO-ya daxil olmamasıdır”.
Bu sözləri Etnik və Beynəlxalq Araşdırmalar Mərkəzinin elmi direktoru, “Arxont” jurnalının baş redaktoru, rusiyalı politoloq Anton Bredixin Rusiya və Ukrayna nümayəndə heyətləri arasında İstanbulda keçirilən görüşün nəticələrini modern.az-a şərh edərkən deyib.
Onun iddiasına görə, Ukrayna tərəfi Türkiyədəki danışıqlarda yeni heç nə təqdim etməyib:
"Ölkənin nüvə silahı yox idi və Budapeşt Konvensiyasına uyğun olaraq, buna sahib ola bilməzdi. Ukrayna əslində neytral statusa malik idi. NATO Ukraynanı üzvlüyə qəbul etmir, eyi zamanda on ildən artıqdır ki, Avropa İttifaqına qoşulmağa çalışırlar. Əslində bu, mövcud status-kvonun bəyanatıdır. Rusiyadan heç bir güzəşt olmayacaq və danışıqlar davam edəcək. Türkiyə Prezidenti Rəcəb Tayyib Ərdoğanın və iş adamı Roman Abramoviçin pərdəarxası rolu iki ölkə arasında danışıqlarda önəmlidir. Davamını səbirsizliklə gözləyirik".
Politoloq, həmçinin qeyd edib ki, Rusiyaya qarşı tətbiq ediləm sanksiyalardan Avropa və ABŞ-ın özü də əziyyət çəkəcək:
“Bu sanksiyalardan ən çox əziyyət çəkən ABŞ və Avropa Birliyinə üzv ölkələr, həm də bu ölkələrin vətəndaşlarıdır. Onlar sanksiyaların gələcəkdə hansı nəticələrə gətirib çıxaracağını düzgün hesablamayıblar. Çünki hazırda Rusiyada ərzaq qıtlığı yoxdur, mağazalarda hər şey var, qiymətlər isə müəyyən parametrlərə görə artıb. Amma gələcəkdə Avropanı nə gözlədiyini deyə bilmərik. Dünən qəbul olunan qərara görə, Rusiyanın çəkisi daha da artacaq. Bizə dost olmayan Qərb ölkələri Rusiya qazına görə məbləği rublla ödəməli olacaqlar. Biz iqtisadiyyatı və zamanı dəyişdirəcəyik”.
Qeyd edək ki, bu yaxınlarda Türkiyənin İstanbul şəhərində Rusiya və Ukrayna nümayəndə heyətləri arasında görüş keçirilib. Rəsmi Kiyev İstanbul danışıqlarında Rusiyaya öz təkliflərini çatdırıb. Ümumilikdə bu görüşün nəticələri hər iki tərəfdən müsbət qiymətləndirilir.
Rusiya Prezidentinin köməkçisi Vladimir Medinski görüşdən sonra mediaya açıqlamasında deyib ki, Ukrayna özünün neytral və nüvə silahından azad statusu barədə Moskvaya yazılı təklif verib. Onun sözlərinə görə, təklifdə Ukraynanın bloklara qoşulmayacağı, hər hansı kütləvi qırğın silahını, o cümlədən kimyəvi və bakterioloji silahları, xarici ölkələrin bazalarını və qoşunlarını öz ərazisində yerləşdirməyəcəyi əksini tapıb. Eyni zamanda, Ukrayna Krımı və Sevastopolu hərb yolu ilə geri qaytarmaqdan imtina edir. Təkliflərdə Ukraynanın təhlükəsizliyinin təminatçısı olan ölkələrin də siyahısı yer alıb.
Medinski onu da qeyd edib ki, Ukrayna Rusiya ilə müqavilə barədə yekun qərarın iki ölkənin dövlət başçılarının görüşündə verilməsini xahiş edib. Rusiya bununla bağlı qərarını açıqlayacaq.
Ukrayna prezidentinin müşaviri Oleksiy Arestoviç isə bildirib ki, təklif olunan sülh sazişinin şərtləri Kiyevin qələbəsidir. Onun fikrincə, bu həftənin əvvəlində İstanbulda baş tutan danışıqlar zamanı Rusiya ilə müzakirə edilən sülh sazişinə əsasən, Ukrayna rəsmi Moskvanın veto qoya bilməyəcəyi beynəlxalq təhlükəsizlik zəmanətləri əsasında mümkün təhdidlərdən qorunacaq.
