Xankəndidə erməni deputatları daşa basdılar
Azərbaycan dövlətinin icazəsi olmadan ölkəmizin sərhədlərini pozaraq, Qarabağa gəlmiş Ermənistan parlamentinin bir qrup üzvü Xankəndidə sürprizlə üzləşiblər.
Azsiyaset.com erməni mediasına istinadən xəbər verir ki, 44 günlük müharibədə məhv edilmiş hərbçilərin valideynləri daşla “silahlanaraq” Xankəndidəki “Ermənistan” mehmanxanasının qarşısına toplaşıblar.
“Vətəndaş müqaviləsi” fraksiyasından olan deputatlara hücum edən etirazçılar Nikol Paşinyanın rəhbərlik etdiyi blokun üzvzlərini uşaqlarının ölümünə görə ittiham ediblər. Qəzəblənmiş kütlə bəyan edib ki, ermənistanlı deputatların Qarabağa gəlməyə haqqı yoxdur.
Erməni mənbələri xəbər verir ki, “Vətəndaş müqaviləsi”nin bəzi tərəfdarları belə məlumatdan qəzəbənərək, heç bir insidentin olmadığını iddia ediblər. Ancaq sonradan baş verənlərin təfərrüatları da ortaya çıxıb. Məlum olub ki, həlak olan hərbçilərin yaxınları deputatların səfər qrafikini öyrəndikdək sonra onların “qardaşlıq məzarlığı”na getməsini əngəlləməyə çalışıblar. Bu mənada etirazçılar İrəvandan gələnlərin yerləşdiyi “Ermənistan” mehmanxanasına daxil olmağa cəhd göstəriblər. Ancaq “polis” qəzəblənmiş insanların qarşısını alıb. Vəziyyətin gərginliyini görən irəvanlı deputatlar qorxularından məzarlığa getməkdən vaz keçməyə qərar veriblər. Sonradan onlar Qarabağın separatçı “rəhbərliyi”nin və mühafizəçilərin əhatəsində qəbirləri ziyarət edibər.
Qarabağdakı qondarma “parlament”in “deputat”ı David Qalstyan isə deyib ki, qəbristanlığı ziyarətlə bağlı qrafikə dəyişiklik edilib. Belə ki, ziyarət əvvəlcədən saat 11.00-da reallaşdırılmalı olduğu halda, saat 10.00-a təyin edilib. Heç şübhəsiz ki, bu qərar qəzəbli kütlədən yayınmaq üçün verilib. Beləcə, vitse-spiker Ruben Rubinyan, Ayk Kondjaryan, Andranik Koçaryan, Rustam Bakoyan, Vladimir Vardanyanın Qarabağ separatçılarının “müstəqillik günü”ndə iştirak üçün Qarabağa qanunsuz səfərini elə ermənilər özləri burnundan gətiriblər.
