Kimin evində varsa, varlanacaq - Heç belə qiymətə olmamışdı

Qlobal maliyyə bazarlarında qızıl qiymətləri ilə bağlı nikbin gözləntilər güclənməkdə davam edir. ABŞ-ın investisiya bankı Goldman Sachs qızıl üzrə uzunmüddətli proqnozunu yenidən təsdiqləyərək, 2026-cı ilin sonuna qədər bir unsiya qızılın qiymətinin 4900 dollara çata biləcəyini bildirib. Bank hesab edir ki, mərkəzi bankların davam edən alışları və investorların "təhlükəsiz liman" axtarışı qiymət artımını dəstəkləyəcək.

"Azsiyaset" musavat.com-a istinadla xəbər verir ki, Goldman Sachs analitiklərinin fikrincə, xüsusilə inkişaf etməkdə olan ölkələrin mərkəzi bankları valyuta ehtiyatlarını şaxələndirmək məqsədilə qızıl alışlarını davam etdirir. Bankın məlumatına görə, may ayında mərkəzi banklar 81 ton qızıl alıblar ki, bu da son illərin orta göstəricisindən xeyli yüksəkdir.

Bank hesab edir ki, ABŞ Federal Ehtiyat Sisteminin (FED) gələcəkdə faiz dərəcələrini aşağı salması ehtimalı qızıla olan investisiya marağını daha da artıra bilər. Faizlərin enməsi qızıl saxlamağın alternativ xərclərini azaltdığı üçün qiymətli metala tələbin yüksəlməsi gözlənilir.

Bütün maliyyə institutları eyni dərəcədə nikbin deyil. HSBC, Bernstein, Saxo Bank və Bank of America uzunmüddətli perspektivdə qızıla müsbət yanaşsalar da, yaxın aylarda yüksək faizlər, güclü dollar və geosiyasi risklərin qiymətlərdə dalğalanma yarada biləcəyini bildirirlər. Bank of America hətta 2026-cı il üzrə orta qiymət proqnozunu 4360 dollara endirib.

Mütəxəssislər vurğulayırlar ki, iri investisiya banklarının proqnozları bazar gözləntilərini əks etdirir və qəti nəticə kimi qəbul edilməməlidir. Qızılın qiymətinə ABŞ-də faiz qərarları, inflyasiya göstəriciləri, mərkəzi bankların siyasəti və geosiyasi hadisələr təsir göstərməyə davam edəcək.