Yevlaxda keçirilən aksiyaya rəsmi cavab - "Əhali tərəfindən istifadə olunan suyun dəyəri ödənilməyib"
Yevlax rayonu Qaraməmmədli kənd sakinlərinin bir qrup sakini icra başçısı və deputata qarşı etiraz ediblər.
Yerli sakinlərin sözlərinə görə, etiraza səbəb iki aya yaxındır, kəndin bir hissəsində suyun olmamasıdır.
Məsələ ilə bağlı Yevlax şəhər İcra Hakimiyyətindən Azsiyaset.com-a bildirilib ki, Yevlax rayonunun Qaraməmmədli kəndində 25 evdə yaşayan təxminən 120 nəfər sakinin içməli su və həyətyanı sahələrinin suvarılmasında istifadə etdikləri Su kanal idarəsinin balansında olan subartezian quyusunun 3 il ərzində elektrik enerjisi sərfiyyatına 6200 manat borc yaranıb:
“Araşdırma zamanı məlum olub ki, bu illər ərzində əhali tərəfindən istifadə edilən suyun dəyəri Su kanal idarəsinə ödənilməyib. Yaranmış borc məbləği ödənilmədiyi üçün subartezian quyusu “Yevlax Elektrik Şəbəkəsi” tərəfindən elektrik şəbəkəsindən ayrılıb. Kənd sakinləri Yevlax Şəhər İcra Hakimiyyətinə müraciət ediblər, Şəhər İcra Hakimiyyətində aidiyyatı qurumların rəhbərliyi ilə dəfələrlə qəbul ediliblər və qanunamüvafiq izahatlar verilib. İzahatlarla qane olmayan sakinlər müxtəlif sosial şəbəkələrdə tələblər irəli sürürlər”.
