Ukraynada həlak olan azərbaycanlıların sayı nə qədərdir?
İndiyə kimi Ukraynada döyüş şəratində ölən azərbaycanlıların sayı açıqlanıb.
Bu barədə Ukrayna Azərbaycanlıları Birləşmiş Diasporunun mətbuat katibi Qalib Osmanlı bildirib.
O qeyd edib ki, indiyə kimi döyüşlərdə 70-ə yaxın azərbaycanlı döyüşçü həlak olub:
"Ukraynada Rusiya imperializminə qarşı hazırda minlərlə soydaşımız döyüşür. İndiyə kimi 70-ə yaxın soydaşımız döyüş şəratində həlak olub. Yaralılarımız var, itkin düşənlərimiz var. Bu istiqamətdə fəaliyyət göstərən Ukrayna-Azərbaycan Müharibə Döyüşçüləri Qardaşlıq Cəmiyyəti adlı təşkilat yaradılıb. Təşkilatin sədri soydaşımız Vidadi İsrafilovdur. O, həm də Ukrayna Azərbaycanlıları Birləşmiş Diasporunun sədr müavinidir. Vidadi İsrafilovun rəhbərlik etdiyi təşkilat həlak olan soydaşlarımızın dəfni, yaralananların müharibə ərazisindən çıxarılması, onlara maddi və mənəvi dəstəyin göstərilməsi istiqamətində fəaliyyət göstərir".
Q.Osmanlı vurğulayıb ki, təşkilat həmçinin xidmətdə fərqlənən hərbçilərin təltif olunmasını təşkil edir:
"Həlak olan soydaşlarımıza ölümündən sonra orden və medallar verilir, adlarının əbədiləşdirilməsi istiqamətində işlər görülür. Həmçinin petisiyalar təşkil edilir və Milli Qəhrəman adının verilməsi istiqamətində addımlar atılır".
Müsahibimiz bildirib ki, Ukraynada davam edən müharibədə həlak olmuş azərbaycanlı döyüşçü Novruzov Elvin İlqar oğluna Ukraynanın Milli Qəhrəmanı fəxri adı verilib. O, 2 aprel 2023-cü il tarixində həlak olub(modern.az).
