"Azəristiliktəchizat" abonentləri məhkəməyə verib - Əhaliyə qarşı hücum
“Azəristiliktəchizat” ASC-nin balansında olan 1000 kilometrdən artıq istilik xətləri mövsümə hazırlıq çərçivəsində dəfələrlə hidravlik təzyiqlə sınaqdan keçirilib. Axıntı və qəza riski müəyyən olunan xətlərdə cari və əsaslı təmir-bərpa işləri aparılıb.
Bu barədə modern.az-ın sorğusuna cavab olaraq “Azəristiliktəchizat” ASC-nin mətbuat katibi Elvin Basqallı məlumat verib.
Qurum rəsmisi bildirib ki, “Azəristiliktəchizat” ASC-nin balansında olan 550 qazanxana yoxlanılaraq tam hazır vəziyyətə gətirilib. Ümumilikdə 80 mindən çox avadanlıq saz vəziyyətə gətirilib.
Qeyd edilib ki, 2023-cü ildə əhali abonentləri üzrə ödəniş səviyyəsi 71,3 faiz, ümumi (əhali və qeyri-əhali) göstərici isə 86,8 faiz təşkil edib. 2024-cü ildə bu rəqəmlər müvafiq olaraq 77,6 və 89,3 faiz olub. 2025-ci ildə isə əhali üzrə ödəniş faizi 88,9, ümumi göstərici isə 88,7 faiz təşkil edib.
Hazırda ümumiyyətlə ödəniş etməyən abonentlərin borcu 4 milyon 444 min 523 manat təşkil edir. Qeyd olunur ki, borcların ən aşağı ödəniş faizi qaçqın və məcburi köçkünlər üçün nəzərdə tutulan qəsəbələrdə qeydə alınıb.
Əlavə olaraq qurumdan verilən məlumata görə, ASC tərəfindən əhali istehlakçı qrupu arasında borcların vaxtında ödənməsi üçün həm media vasitəsilə, həm fərdi qaydada, həm də binaların girişlərinə elanlar vurulmaqla xəbərdarlıqlar edilir.
“Hazırda ödənişdən imtina edən bəzi istehlakçılarla bağlı 31 məhkəmə işi icra mərhələsindədir. Bu işlər “Azəristiliktəchizat” ASC tərəfindən məhkəməyə təqdim olunub”,- rəsmi məlumatda bildirilir.
Qeyd edək ki, Tarif (qiymət) Şurası bu ilin uyulunda əhaliyə göstərilən istilik təchizatı xidməti üçün yeni tarif müəyyənləşdirib.
Belə ki, əhali istehlakçı qrupuna göstərilən istilik təchizatı xidmətinin tarifi sayğac quraşdırılmadığı halda aylıq 1 m2 üçün 45 qəpik səviyyəsində təsdiq edilib. Sayğac quraşdırıldıqda isə 1 Qkal üçün (təqribən 40-50 m² sahə üçün) 21 manat müəyyənləşdirilib.
Azərbaycanda istilik sistemi hər il noyabrın 15-də işə salınır.
