Elçibəyin köməkçisi Şahlar Əsgərova cavab verdi

Hakim Yeni Azərbaycan Partiyasının (YAP) yaradılmasında aktiv iştirak etmiş "91-lər"in üzvü, sabiq deputat Şahlar Əsgərovun mərhum eks-prezident Əbülfəz Elçibəy haqda fikirlərinə qarşı tərəfdən reaksiya gəlib. 

Xatırladaq ki, Ş.Əsgərov Elçibəyi "91-lər"in çağırışına qoşularaq mərhum dövlət başçısı Heydər Əliyevi Bakıya dəvət edən "92-ci ziyalı" adlandırıb.

Əbülfəz Elçibəyin prezidentliyi dövründə və ondan sonra da köməkçisi olmuş Oqtay Qasımov məsələ ilə bağlı Modern.az-a açıqlama verib. 

O bildirib ki, siyasi məsələlərə Şahlar Əsgərovdan fərqli yanaşırlar:

“Şahlar Əsgərov Azərbaycanın tanınmış ziyalısıdır. Onun özünün siyasi mövqeyi olub. Parlamentin üzvü, Təhsil komissiyasının sədri olub. Siyasi proseslərə öz baxışı, düşüncəsi var. Biz də buna hörmətlə yanaşırıq. “91-lər” bir qrup ziyalı idi, onlar Heydər Əliyevə siyasi hakimiyyətə qayıtması üçün müraciət etmişdilər. Onun yaratdığı partiyada təmsil olunurdular. Heydər Əliyev hakimiyyətə gələndən sonra onların əhəmiyyətli hissəsi bu və ya digər formada dövlət qurumlarında, parlamentdə müəyyən vəzifələr tutdular. 

Heydər Əliyevin hakimiyyətə gəlməsi ilə bağlı çox fikirlər söylənib. 1993-cü ildə Azərbaycanda Rusiya və İran tərəfindən planlaşdırılan dövlət çevirilişinə cəhd olub. Gəncədə Sürət Hüseynovun başçılığı ilə qiyam qaldırılıb. Rusiya və İran məhz vətəndaş müharibəsi ilə hakimiyyəti dəyişməyə cəhd etdilər. Əbülfəz Elçibəy də vətəndaş müharibəsi baş verməsin və Azərbaycanda xarici qüvvələrin planları həyata keçməsin deyə, Heydər Əliyevlə hakimiyyətə gəlməsi üçün əməkdaşlıq edib.

Hər kəsin bu məsələyə öz yanaşması var. Şahlar Əsgərovla bizim məsələlərə, siyasi proseslərə baxışımız fərqlidir. Şahlar Əsgərov məsələyə başqa cür yanaşır və Əbülfəz Elçibəyin rolunu belə dəyərləndirir. Təbii ki, Əbülfəz Elçibəy təsadüfən Heydər Əliyevi Bakıya dəvət etmədi. Bunu ölçdü-biçdi və Azərbaycan dövlətinin müstəqilliyinin davam etməsi üçün o varianta üstünlük verdi. Əks halda Rusiya tərəfindən planlaşdırlan dövlət çevrilişinə görə Ayaz Mütəllibov, Sürət Hüseynov və ya o zaman bəlli şəxslərdən hansınasa hakimiyyət ötürülməliydi. Həmin şəxslər hakimiyyəti ələ keçirsə, Azərbaycanın müstəqilliyi ilə bağlı problemlər yaşana bilərdi".

O.Qasımov Şahlar Əsgərovun Elçibəydən prezident kimi yox, ziyalı olaraq bəhs etməsinə də münasibət bildirib:

"Qeyd etdim ki, hər kəsin məslələrə yanaşmada öz düşüncəsi var. Buna hörmətlə yanaşmaq lazımdır. Təbii ki, Əbülfəz Elçibəy ziyalı idi və Azərbyacanın elm mühitində qəbul olunurdu. Əbülfəz Elçibəyin həm elm sahəsində gördüyü işlər, həm də siyasətdə qoyduğu mövqe, cərəyan bəllidir. Elçibəy yalnız ziyalı deyildi, həm də siyasi xadim idi. 70-ci illərdə məhz siyasi baxışlarına görə həbs edilmişdi. O, Azərbaycanın ilk dissidentlərindən də sayıla bilər. Bundan başqa, Azərbaycan Xalq Cəbhəsi kimi böyük siyasi təşkilat qurub, milli azadlıq hərəkatına rəhbərlik edib. Məhz onun liderliyi ilə Azərbaycanın müstəqilliyi əldə olunub, Xalq Cəbhəsi hakimiyyətə gəlib, dövlət quruculuğu sahəsində islahatlar həyata keçirilib, Azərbaycanın milli pulu dövriyəyə buraxılıb, rus qoşunları ölkəmizdən çıxarılıb. Bununla bağlı uzun danışmaq olar. Bu baxımdan Əbülfəz Elçibəy elm adamı olduğu qədər, ilk növbədə siyasətçidir. Azərbaycan dövlətinin prezidenti olub. Kimin bu məsələyə necə baxmağından asılı olmayaraq, onun prezidentliyi dövründə bir sıra ciddi nəticələr əldə olunub. Bu baxımdan Əbülfəz Elçibəy Azərbaycanda dövlət adamı kimi qəbul olunur, tarixdə də siyasi xadim olaraq qalacaq, nəinki elm adamı kimi".