Avropa İttifaqı Ukraynaya 90 milyard avro ayırdı
Avropa İttifaqı sammitinin iştirakçıları Rusiya aktivlərinin müsadirə edilməsi ilə bağlı razılığa gələ bilməsələr də, Avropa Komissiyasına lazımi sənədlərin hazırlanmasını davam etdirməyi tapşırıblar.
Bunu Avropa Komissiyasının prezidenti Ursula fon der Lyayen sammitdən sonra keçirilən mətbuat konfransında açıqlayıb:
"Aİ sammiti Ukraynaya növbəti iki il ərzində sıfır faizli ümumavropa krediti vasitəsilə 90 milyard avro məbləğində maliyyələşdirmə qərarı verdi. Bu, Aİ büdcəsindən Aİ ölkələri arasında əməkdaşlığın gücləndirilməsi yolu ilə əldə ediləcək. Ukrayna bu krediti yalnız Rusiyadan təzminat aldığı təqdirdə geri qaytarmalı olacaq. O vaxta qədər Rusiyanın aktivləri dondurulmuş qalmalıdır. Aİ onlardan istifadə etmək hüququnu özündə saxlayır. Sammitdə Avropa Komissiyasına bu imkanı araşdırmağa davam etmək tapşırılıb".
