FED-də dəyişiklik bazarları silkələdi - Qızıl və gümüş "çökdü", neft ucuzlaşdı

ABŞ Federal Ehtiyat Sistemində (FED) rəhbərliklə bağlı qərar qlobal maliyyə və əmtəə bazarlarında kəskin dalğalanmaya səbəb olub.

Reuters xəbər verir ki, ABŞ Prezidenti Donald Trampın FED-ə rəhbərlik üçün Kevin Uorşu seçməsi investorlar arasında ciddi narahatlıq yaradıb və genişmiqyaslı satış dalğası başlayıb.

Bazar ertəsi günü ticarət zamanı qızılın qiyməti 9 faiz ucuzlaşaraq son iki həftənin ən aşağı səviyyəsinə enib. Gümüş isə ötən həftə tarixi maksimuma çatdıqdan sonra 13 faizdən çox dəyər itirib. Beləliklə, hər iki qiymətli metal ardıcıl ikinci ticarət sessiyasında kəskin eniş nümayiş etdirib.

Neft bazarında da oxşar mənzərə yaranıb. Neftin qiyməti təxminən 5,5 faiz ucuzlaşaraq son ayların maksimum göstəricilərindən geri çəkilib. London Metal Birjasında misin qiyməti isə təxminən 5 faiz azalıb.

“Commonwealth Bank of Australia”nın əmtəə bazarları üzrə strateqi Vivek Dhar bildirib ki, həm qiymətli metallarda, həm də ABŞ səhm bazarlarında satışların artması investorların Kevin Uorşu daha sərt, yəni “şahin” mövqeli FED rəhbəri kimi qəbul etdiyini göstərir.

Onun sözlərinə görə, ABŞ dollarının möhkəmlənməsi də qızıl, neft və sənaye metalları üzərində əlavə təzyiq yaradır. Bununla belə, Vivek Dhar ilin dördüncü rübü üçün qızılın qiymətinin 6 min dollara çata biləcəyi ilə bağlı proqnozunu dəyişmədiyini bildirib.

Xatırladaq ki, Donald Tramp cümə günü FED-in keçmiş idarə heyətinin üzvü olan Kevin Uorşun may ayında Cerom Paueli əvəz edəcəyini açıqlayıb. Bu açıqlama fond və əmtəə bazarlarında satışları sürətləndirib, eyni zamanda ABŞ dollarının möhkəmlənməsinə səbəb olub.