Pakistan və İrandan mühüm iqtisadi addım - Yeni tranzit dəhlizi açıldı

Pakistan hökuməti öz ərazisi vasitəsilə İrana malların tranzitinə rəsmi icazə verən mühüm qərar qəbul edib.

"The Express Tribune" nəşrinin Pakistan Ticarət Nazirliyinə istinadən yaydığı məlumata görə, artıq qüvvəyə minmiş "İranla tranzit ticarəti 2026" adlı yeni qaydalar iqtisadi münasibətlərdə yeni mərhələnin əsasını qoyur. Bu sənəd istənilən üçüncü ölkədən gələn malların Pakistan ərazisindən keçərək İranın müəyyən edilmiş məntəqələrinə çatdırılmasına hüquqi zəmin yaradır.

Ekspertlər və yerli media bu qərarı transsərhəd ticarətinin genişləndirilməsi istiqamətində "vacib bir addım" kimi qiymətləndirirlər. Yeni tranzit rejimi həm Pakistanın logistik potensialını artırmağa, həm də İranın xarici ticarət dövriyyəsini asanlaşdırmağa xidmət edəcək. Xüsusilə regional gərginliyin və sanksiyaların olduğu bir dövrdə Pakistanın bu addımı Tehran üçün iqtisadi nəfəslik rolunu oynaya bilər.

Ticarət Nazirliyi qeyd edib ki, tranzit prosesi zamanı beynəlxalq standartlara və təhlükəsizlik qaydalarına ciddi riayət olunacaq. Bu qərarın həmçinin regionun nəqliyyat qovşağına çevrilməsi istiqamətində atılan strateji addımlardan biri olduğu vurğulanır. Hazırda gömrük-keçid məntəqələrində yeni qaydalara uyğun texniki hazırlıq işləri aparılır.