ABŞ-də səssiz çevriliş olub
Türkiyəli tanınmış jurnalist İsmail Bendideriya ABŞ-də son günlər baş verən proseslərlə bağlı diqqətçəkən və mübahisəli açıqlamalar verib.
O, "Ulusal TV"-nin efirində çıxışı zamanı Amerikada “səssiz çevriliş” baş verdiyini iddia edib.
Jurnalistin sözlərinə görə, bu proseslərdə əsas rolun İsrailə yaxın qüvvələrə aid olduğu irəli sürülür:“Amerikada bundan bir həftə, 8 gün əvvəl səssiz bir çevriliş oldu. Bu çevrilişi İsrail qanadı etdi. İsrail rəsmi olaraq Donald Tramp vasitəsilə Amerikada milli qüvvələri kənarlaşdırdı.
O, son dövrlərdə ABŞ-də vəzifədən uzaqlaşdırılan hərbçilər və kəşfiyyat əməkdaşlarına diqqət çəkərək bildirib ki, bu proseslər ölkə daxilində ciddi sarsıntılara səbəb olub: “Vəzifədən alınan generallara baxın, uzaqlaşdırılan Mərkəzi Kəşfiyyat İdarəsi əməkdaşlarına baxın. Amerikada hazırda ciddi silkələnmə yaşanır”.
Jurnalist həmçinin ABŞ daxilində bu proseslərə qarşı narazılığın artdığını iddia edib. Onun sözlərinə görə, bəzi hərbçilər İsrailin maraqları uğrunda döyüşmək istəmədiklərini açıq şəkildə ifadə ediblər: “Sistem nə qədər problemli olsa da, Amerikada da bu dövləti öz dövləti sayan insanlar var və bu baxımdan müəyyən qədər haqlıdırlar. Bu dövlət nə Trampın, nə də İsrailindir. Kimlər orada istefa verdi və etiraz etdi? Amerikalı əsgərlər. Onlar dedilər ki, biz amerikalı əsgərləri İsrail üçün qurban verə bilmərik. Uşaqlarımızı İsrail yaşasın deyə fəda edə bilmərik. Əgər müharibə olacaqsa, İsrail özü döyüşsün, bunun bizə nə aidiyyəti var? Onlar kənara çəkildilər. Etiraz edənləri isə həbs etdilər. Amerika hazırda bir çevriliş yaşayır. Amerikalı milli qüvvələr bunun hesabını siyonistlərdən soruşacaq. Buna görə də Amerika yaxın günlərdə daha da qarışacaq".
Açıqlamada ABŞ-də kütləvi etiraz aksiyalarının keçirildiyi də diqqətə çatdırılır:“Bu günlərdə Amerikada milyonlarla insan küçələrə çıxıb. Mən 30 ildən çoxdur medianı izləyirəm, belə bir vəziyyət görməmişəm”.
İsmail Bendideriya qeyd edib ki, baş verən hadisələr gələcəkdə daha böyük qarşıdurmalara səbəb ola bilər və proseslərin həm ABŞ daxilində, həm də beynəlxalq müstəvidə təsirləri gözlənilir: “Böyük ehtimalla, çox ciddi hadisələr baş verəcək. Bu, təkcə Amerikada deyil, onun təsir dairəsində olan bölgələrdə də hiss olunacaq”.
