"Gürcüstana bir cüt qanadlı raket buraxsaq, elə xırda məsələ olacaq ki..." - Rusiyalı ekspert

Ukraynada müharibə başlanandan Rusiya müxtəlif ölkələrə qarşı təhdidləri artırıb.

Əgər Gürcüstan rusiyalı ekspertlərini onun ərazisində olan Amerikanın bioloji laboratoriyalarına buraxmasalar, Rusiyanın bu ölkə üzərinə raket zərbəsi endirməyə tam hüququ olacaq.

Bu barədə Moskva Dövlət Beynəlxalq Münasibətlər İnstitutunun hərbi- siyasi araşdırmalar Mərkəzinin eksperti Mixail Aleksandrov Rusiyanın "Regnum" qəzetinə müsahibəsində bəyan edib.

"Ukraynada əməliyyat keçirdiyimiz şəraitdə Gürcüstan üzərinə bir cüt qanadlı raket buraxmaq elə bir xırda məsələ olacaq ki, dünyada heç kim bunu duya bilməyəcək. Qərb, əlbəttə ki, həmişə olduğu kimi, bağıracaq. Amma niyə bağırsın ki? Rusiyaya qarşı yönələn bioloji laboratoriyaları niyə yaradırlar ki? Buna nə ehtiyac var!", - o, belə deyib.

Xatırladaq ki, Rusiyanın Müdafiə Nazirliyi Ukraynada Amerikanın bioloji silah hazırlanması ilə məşğul olan laboratoriyalar barədə məlumat yayır, bununla da qonşu ölkəyə hərbi müdaxiləsinə haqq qazandırır.

Bu fonda 2011- ci ildə Tbilisidə peyda olan Luqar laboratoriyaları Rusiya KİV-nin "yadına düşüb". Məqalələrdə, məsələn, deyilir ki, 2007- ci ildən Afrikada cərəyan edən donuz taunu məhz bu laboratoriyada ərsəyə gətirilib.

Bundan əvvəl Mixail Aleksandrov Ukraynanın tamamilə məhv edilməsi bəyanatları ilə çıxış edib:

"Ukrayna yox olmalıdır. O, istənilən razılaşmaları pozacaq. Prinsipcə, hazırda hətta Finlandiya Rusiya ilə öz neytrallığı barədə razılaşmalarını pozmaq həddindədir. Ukraynanın belə şəraitdə özünü necə apara biləcəyini təsəvvür etmək olar".

Ukraynada müharibə başlanandan rusiyalı diplomatlar və məmurlar tərəfindən müxtəlif ölkələrin ünvanına getdikcə daha çox təhdidlər səsləndirilir. 

Dünən Bosniya və Herseqovinaya, bundan əvvəl isə İsveçə də "Ukrayna ssenarisi" ilə hədə- qorxu gəlinib.