"Ukraynada böyük güclərin müharibəsi gedir" - Hammad Xan

“Bu müharibə dünyaya çox böyük təsir göstərəcək”.

Azsiyaset.com xəbər verir ki, bu sözləri yenisabah.az-a açıqlamasında pakistanlı politoloq Hammad Xan Kakar deyib.

Siyasi şərhçi Rusiyanın Ukraynada apardığı işğalçı müharibəni ABŞ-ın müsəlman aləmində apardığı savaşlara bənzədib:

“Rusiyadan əvvəl Amerika və NATO qüvvələri İraqı, Əfqanıstanı, Liviyanı, Suriyanı işğal etmişdi və bu işğal dünyanın indiyədək üzləşdiyi ən böyük terroru yaradıb. Rusiya ilə Ukrayna arasındakı müharibə, əsasən, Rusiya ilə Amerika arasındakı müharibədir. Amerika və Avropa Ukraynadan Rusiyaya qarşı müharibə üçün ərazi kimi istifadə edir. Ona görə də iki super gücün müharibəsində hər zaman günahsız insanlar ölür. Hesab edirəm ki, ABŞ siyasəti ilə Rusiya siyasəti arasında heç bir fərq yoxdur, hər iki dövlət güc qazanmaq üçün mübarizə aparır və bu güc oyununu müxtəlif ölkələrdə günahsız insanları qətlə yetirməklə oynayırlar”.

H.Kakarın sözlərinə görə, Ukrayna, Azərbaycan, Pakistan, Türkiyə, İraq, Suriya və digər dünya ölkələri güc oyununu anlamalıdır:

“Onlar Rusiya və ya Amerikanın öz ölkələrindən istifadə etməsinə imkan verməməlidirlər. Suriya və İraqda olduğu kimi Ukraynada da böyük güclərin müharibəsi davam edir”.

Həmsöhbətimiz Amerikanın Pakistanda aparmaq istədiyi siyasətə də toxunub:

“Amerika Pakistanın xarici siyasətinə qarışdı və İmran Xanı baş nazir postundan uzaqlaşdırdı. Çünki Amerika Pakistandan Əfqanıstana qarşı Hava Bazaları verməsini tələb edəndə İmran Xan “Qətiyyən olmaz!” demişdi. Super güclər də regionda güc qazanmaq üçün digər ölkələrə belə müdaxilə edirlər”.

Ekspert bu savaşı Üçüncü Dünya müharibəsi adlandırır: “İndi vəziyyət çox fərqli olduğundan deyə bilərik ki, Məscidül-Əqsaya hücum, Fələstinə hücum, Ukraynaya hücum, Əfqanıstana hava hücumu və s. Bu, dünyanı Üçüncü Dünya müharibəsinə aparan amillərdir. O ki qaldı Belə olan halda Azərbaycanın nə etməsinə, düşünürəm ki, Azərbaycan da Pakistan kimi neytral qalmalıdır”.