DYP-nin pul tələsi: Piyadalara yol verməyən sürücülər cəzalandırıldı, bəs qanunu pozan piyadalar? - FOTOLAR

Samux Rayon Polis Şöbəsinin Dövlət Yol Polisi Bölməsinin əməkdaşları rayon ərazisində təhlükəsizliyin təmin edilməsi, piyadaların maarifləndirilməsi məqsədilə reyd keçiriblər.

Azsiyasət.com xəbər verir ki, bu barədə yenisabah.az-a Daxili İşlər Nazirliyinin Mətbuat xidmətinin Gəncə regional qrupunun baş inspektoru, polis baş leytenantı Eşqin Qasımov məlumat verib.

Reyd zamanı piyada keçidlərindən istifadə etməyən şəxslər saxlanılıb və onlarla profilaktik söhbətlər aparılıb. Bu kimi qayda pozuntularının onların həm özləri, həm də digər hərəkət iştirakçılarının sağlamlığı üçün təhlükəli olduğu izah edilib. Bundan başqa araşdırmalar zamanı piyadalara yol verməyən sürücülər də aşkar edilərək barələrində müvafiq təbrilər görülüb.

Azsiyasət.com qeyd edir ki, piyadalarla profilaktik söhbətin aparılması yaxşı haldır, ancaq Dövlət Yol Polisinin sürücülərə qarşı davamlı amansız rəftarı bu reyddən də yan keçməyib. Şübhəsiz, sürücülərlə profilaktik söhbət sərf etmir, onların cərimələnməsi daha "əlverişlidir". Piyada vətəndaşlara qarşı cərimələr tətbiq etməyin ictimai müzakirəyə daha geniş yol açma ehtimalı yüksək olduğuna görə, DYP-nin bu dəfəki reydi də sürücülərin başında "çatladı". 

Onu da əlavə edək ki, DYP-də baş verən qanunsuzluqlarla bağlı bir neçə gündür ki, sosial şəbəkələrdə materiallar paylaşılır. Hətta millət vəkili Müşviq Cəfərov sürücülük vəsiqəsi almaq üçün vətəndaşlardan 1000 manat pul tələb olunması ilə bağlı Milli Məclisdə səs-küylü çıxış etmişdi. 

Azsiyasət.com