BŞİH Ticarət və Xidmət Departamentinin direktoru İntiqam Məmmədovun oğlunun avtomobil kolleksiyası - FOTOLAR

Sosial şəbəkələrdə Bakı Şəhər İcra Hakimiyyətinin Ticarət və Xidmət Departamentinin direktoru İntiqam Məmmədovun oğlu Elgiz Əhmədliyə məxsus avtomobil kolleksiyasının fotoları yayılıb. Yayılan məlumatlarda İ.Məmmədovun Dövlət Miqrasiya Xidmətinin Bakı Regional Dövlət Miqrasiya Xidmətinin rəisi vəzifəsində işlədiyi bildirilir.

Azsiyasət.com-un araşdırmaları zamanı bəlli oldu ki, İ.Məmmədov 2018-ci ilin iun ayında Bakı Regional Dövlət Miqrasiya Xidməti idarəsinin rəisi İntiqam Məmmədov tutduğu vəzifədən azad olunub. Lakin o, cəmi bir neçə ay işsiz qalıb. Belə ki, 2018-ci ilin oktyabr ayının 22-də İ.Məmmədov Bakı Şəhər İcra Hakimiyyətinin Ticarət və Xidmət Departamentinin direktoru vəzifəsinə təyin olunub.

Yəni, avtomobil kolleksiyasının fotoları yayılan Elgiz Əhmədlinin atası Miqrasiya Xidmətinin yox, BŞİH-nin yüksək vəzifəli şəxsidir.

Fotolardan da göründüyü kimi, məmur oğlu E.Əhmədli “10-EX-002” dövlət nişanlı bir neçə avtomobil idarə edir. Eyni zamanda, “99-TZ-555” dövlət nişanlı avtomobillər də onundur. Avtomobillərin markaları isə bunlardır: “Mercedes CLS-Class”, “BMW X5M Black”, “Toyota Land Cruiser”, “Porsche Panamera 4S”.

Ümumi dəyəri milyonlarla vəsait edən bu maşın kolleksiyasının sahibi olan gənc oğlanın atası hansı maaşla bu cür təm-təraqlı şərait qura bilib? Bunu araşdırmaq isə hüquq-mühafizə orqanlarının vəzifəsidir. 

Azsiyasət.com