Ərdoğan Azərbaycana rəsmi səfərə gəlib - Şuşada rəsmi qarşılanma... - FOTOLAR
Türkiyə Respublikasının Prezidenti Rəcəb Tayyib Ərdoğan iyunun 15-də Azərbaycan Respublikasına rəsmi səfərə gəlib.
AZƏRTAC xəbər verir ki, hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülmüşdü.
Türkiyə Prezidenti Rəcəb Tayyib Ərdoğanı və xanımı Əminə Ərdoğanı hava limanında Azərbaycan Respublikası Baş nazirinin birinci müavini Yaqub Eyyubov, xarici işlər nazirinin müavini Xələf Xələfov və digər rəsmi şəxslər qarşıladılar.
Bildirilir ki, Ərdoğan Bakıdan Şuşaya gedəcək. Orada onu Azərbaycan prezidenti İlham Əliyev rəsmi mərasimlə qarşılayacaq. Daha sonra iki ölkə liderləri təkbətək görüşəcək. Danışıqların ardınca Şuşada bir sıra anlaşmalar imzalanacaq və ortaq mətbuat konfransı olacaq.
Sabah iyunun 16-da isə Ərdoğanın səfəri Bakıda davam edəcək və Türkiyə prezidenti Milli Məclisdə çıxış edəcək. Daha sonra Türkiyə Milli komandasının futbol üzrə Avropa çempionatı çərçivəsində keçiriləcək oyununu izləyəcək.
