"Burnumuzu İraqın şimalına soxanda Qərb bizə barmaq silkələyirdi, Qarabağa qədər getdikmi?.." - Süleyman Soylu

Türkiyənin daxili işlər naziri Süleyman Soylu Muş vilayətinin yüksək dağlıq ərazilərində jandarma kazarmasının açılışını etdikdən sonra vilayətin Hasköy rayonunda yerli sakinlər qarşısında çıxış edib.

“Anadolu” agentliyinin xəbərinə görə, Soylu Türkiyənin terrorla mübarizə sahəsində qazandığı nailiyyətlərdən və ölkənin regionda təsirlərinin artmasından danışıb. Və Qərbi tənqid edib.

Süleyman Soylunun sözlərinə görə, bir virus (koronavirusu nəzərdə tutur) özünü dünyanın hakimi hesab edənlərə evdən çıxmağa imkan vermədi.

“Dünyanın hakimi kimmiş? Cənabi Allah. Onlar özlərini elə zənn edirdilər. Bir virus o Qərb dünyasına, biz dünyanın hakimiyik deyənlərə həddini bildirdi. Sadəcə Türkiyədəki hüzur deyil, ətrafımızdakı coğrafiyada hüzuru da Türkiyə qonşuluğun, insanlığının, müsəlmanlığının gərəyi olaraq təmin etməyə çalışır. Çünki ətrafımızdakı coğrafiyanı da terror dəhlizi halına gətirməyə çalışırıar. Buna hörmətli prezidentimiz imkan vermədi. Burnumuzu İraqın şimalına, Suriyaya soxanda Qərb bizə barmaq silkələyirdi. İndi Şərqi Ağdənizdə varıqmı, Liviyada hüzuru təmin edirikmi, Qarabağa qədər getdikmi?”,- Türkiyə daxili işlər naziri bildirib.