"Yüz minlərlə maliyyə alan bəzi media orqanları özünü doğrulda bilməyib" - Vasif Həsənli
Baş redaktor: “Onlayn media subyektlərinə göstərilən maddi dəstək islahatların bir hissəsidir”
Medianın İnkişafı Agentliyi (MEDİA) çap mediası və onlayn media subyektlərinin inkişafı, habelə dövlət və cəmiyyət üçün əhəmiyyət kəsb edən layihələrin həyata keçirilməsi məqsədilə müsabiqə təşkil edib.
Müsabiqəyə 96 veb-sayt müraciət edib, ancaq 39 sayta maliyyə yardımı ayrılıb. Agentliyin seçimi ictimaiyyətdə birmənalı qarşılanmayıb.
“Demokrat.az” xəbər portalının baş redaktoru Vasif Həsənli “Bakı-Xəbər”ə açıqlamasında qeyd etdi ki, müsabiqədə qaliblər sırasında olmaq xoşdur və bundan sonra da onlara bəslənən ümidləri doğrultmağa çalışacaqlar:
“Hazırda müsabiqə qalibi olan saytların bir çoxu az vaxtda faydalı iş əmsalı ilə seçilib. Düşünürəm ki, rəhbəri olduğum "Demokrat.az" saytı da bu mənada seçilənlər arasındadır və yəqin ki, biz də öz işimizlə qısa zamanda oxucuların sevimli xəbər portalına çevrilə bilmişik. Müsabiqənin yekununda kənarda qalan saytların rəhbərlərindən bir çoxu absurd fikirlər səsləndirir. Onlardan bəziləri illər boyu medianın kökünə balta vurmaqla bu sahəni uçuruma gətiriblər. İndiki halda, uçurumdan çıxmaq üçün media islahatlarına start verilib. Amma medianı bu vəziyyətə gətirənlər yenə də öz çirkin niyyətlərindən əl çəkmirlər. Onlayn media subyektlərinə göstərilən maddi dəstək islahatların bir hissəsidir. Hesab edirəm ki, müsabiqədə qalib gəlməyənlər tələb olunan şərtlərə cavab verməyiblər. Lakin bu da son deyil. Şərtlərə cavab verməklə onlar da gələcəkdə qaliblər sırasında ola bilərlər. İşə yeni başlanıb və belə görünür ki, konsepsiyanın davamı olaraq perspektivdə digər yeniliklərlə tanış olacağıq”.
Həmsöhbətimiz onu da əlavə etdi ki, vaxtilə KİVDF-dən yüz minlərlə maliyyə yardımları alan media orqanlarının bəziləri özlərini nə doğrulda bilib, nə də ortaya səmərəli bir iş qoya biliblər:
“Qalib olmayan və həmkarlarına irad tutan həmin media rəhbərləri içlərindəki qısqanclığı kənara atsalar, daha yaxşı olar. Hamı onları yaxşı tanıyır. Ötən illər ərzində özünü oliqarx məmur kimi aparan, daha çox kreslo, pul davası edənlər indi cırmaq atmaqla məşğuldurlar. Onlar gündüzlər özlərini guya bitərəf aparan, gecə düşən kimi hakimiyyətə qarşı çıxan məxluqlardır. Həmin məxluqlar o qədər harınlayıblar ki, Prezidentin media siyasətinə qarşı çıxmaqdan belə çəkinmirlər. Bununla da öz sahiblərinə sadiq olduqlarını nümayiş etdirirlər. Artıq gün kimi aydındır ki, bəzi üzdəniraq media rəhbərlərinin vədəsi dolub, onların vaxtına az qalıb. Eybi yox, qoy başlarını son çırpıntıları ilə qatsınlar”.
