"Ermənistanda vəziyyət dözülməz həddə çatacaq" - Türk general

"Ermənistan müharibə meydanında məğlub oldu, 10 noyabr üçtərəfli sazişi ilə bu məğlubiyyət təsdiqləndi. O gündən bu günə qədər də məğlub olmağa və yalan, saxta hərəkətlərlə başqa ölkələrin diqqətini çəkməyə, məsələni konteksdən kənarlaşdırmağa davam etməkdədir".

Bunu Milli.Az-a açıqlamasında Türkiyənin Azərbaycandakı keçmiş hərbi attaşesi, ordunun ehtiyatda olan generalı Yücel Karauz deyib.

General bildirib ki, Ermənistan niyyətindən əl çəkməsə məğlub olmağa məhkumdur:

"Azərbaycan Füzuli və Zəngilanın 92 mindən çox mina xəritəsini böyük bir diplomatik uğurla əldə edərək müharibə meydanında qazandığı qələbəni daha da zirvəyə qaldırmağı bacardı. Bu hadisə Azərbaycan dövlətçiliyinin, Prezident İlham Əliyevin uğurlu siyasətinin davamıdır. 

Mina xəritələrinin alınması ilə təhlükəsizlik ən qısa zamanda təmin ediləcək, insanlarımız tez bir zamanda doğma yurdlarına, bulaqlarına, dədə-baba məzarlarına qovuşacaqlar. 

Azərbaycan niyə müharibə meydanında qazandığı qələbədən, 10 noyabr bəyanatından sonra yenə ancaq qalib gəlməyə davam edir deyə düşünmüş olsaq - çünki bu, Azərbaycanın haqq savaşıdır. Azərbaycanın haqq savaşı Azərbaycanın ərazi bütövlüyü çərçivəsində ən qısa zamanda həll olunmalıdır və Azərbaycan bu yolda beynəlxalq hüquq nöqteyi nəzərdən də tam haqqlıdır.

Prezident İlham Əliyevin apardığı uğurlu siyasət nəticəsində Azərbaycan bundan sonra da qələbələr qazanmağa davam edəcək, Ermənistan isə bu cür saxtakarlıqla məğlub olmağa məhkumdur və 44 günlük müharibədən sonra dərinləşən böhran onlar üçün vaxt keçdikcə vəziyyəti daha da dözülməz həddə çatdıracaq. Ermənistan mina xəritələrini hər hansı bir təzyiq və yaxud saxlanılan diversantları qarşılığında yox, könüllü sürətdə versəydi sülhə də töfhə vermiş olardı.

Ermənistanın bundan sonra Qubadlı, Cəbrayıl, Laçın və Kəlbəcər istiqamətindəki və bütün digər ərazilərin mina xəritələrini vermək haqda düşünməlidir. Ermənistan bunu etməklə sülhə, 10 noyabr bəyanatına və atəşkəs sazişinin sülh sazişinə çevrilməsinə imkan yaradacaq. Hə, bunu ya könüllü sürətdə edəcəkdir, ya da Azərbaycan haqq və hüquq savaşını güc əldə edərək, diplomatik, siyasi gücü, beynəlxalq səviyyədəki nüfuzu nəticəsində təmin edəcəkdir. 

Mina xəritələrinin bu yolla alınması ilk öncə təhlükəsizlik məsələsini çox qısa zamanda təmin etməyə şərait yaradacaq, minalarla insanın həyati təhlükəsinin önünə keçib, ölüm riskini azaldıb və maddi olaraq da böyük imkan yaradıb. Bu nəticə bunların hamısından daha önəmlidir, bu, Azərbaycan dövlətçiliyi və siyasi iradəsinin gücü və zəfəridir".