Bu foto ilə məşhurlaşan süpürgəçi niyə işdən çıxarılıb?
Bir müddət öncə azyaşlı qızı ilə işlədiyi ərazini süpürərkən “Qafqazinfo”nun fotoqrafı Nuran Məmmədov tərəfindən şəkli çəkilən və həmin foto ilə ictimaiyyətin diqqətini çəkərək sosial şəbəkələrdə və mediada müzakirə mövzusu olan Şövkət Əliyeva işdən çıxarıldığını bildirir.
Ş.Əliyeva “Qafqazinfo”ya müraciət edərək bildirib ki, mayın 14-də həmin foto geniş yayıldıqdan sonra işlədiyi Səbail rayon Mənzil Kommunal İstismar Sahəsinin rəisi Paşa Məmmədov onu çağıraraq bu günlərdə işə gəlməməyi, ümumiyyətlə ortalıqda çox görünməməyi tapşırıb:
“Dedi ki, həmin foto çox yayılıb və bizim idarənin adı hallanır. Ona görə tapşırdı ki, evdə olum, işə gəlməyim. Sonra da məni sığınacağa yerləşdirdilər. Bir neçə gün sonra isə Paşa müəllim məni çağırıb dedi ki, Birliyin rəhbəri Elçin Həsənov mənim işdən çıxarılmağımı istəyir. Onların tələbi ilə işdən çıxmaq haqda ərizə yazdım, məni zorla işdən çıxartdılar”.
Şövkət Əliyeva bildirib ki, fotosu yayılandan bir müddət sonra biznes mərkəzlərinin birindən ona xadimə işləmək təklif olunub: “Mənə dedilər ki, tualetlərin təmizliyinə baxacaqsan, 350 manat maaş alacaqsan. Amma süpürgəçi işləyəndə maaşım 470 manat idi. Mən də dedim ki, tualet təmizləyə bilmərəm, iyrənirəm. Onlar da dedilər ki, işləmək istəyənə oxşamırsız”.
Səbail rayon MKİS rəisi Paşa Məmmədov “Qafqazinfo”ya açıqlamasında bildirib ki, Şövkət Əliyeva həmin foto yayılandan sonra uzun müddət işə gəlməyib: “O xanıma işə gəlməməsi, ortalıqda görünməməsi haqda heç bir tapşırıq verilməyib. Özü işə gəlmədi, ondan sonra başqa yerdə iş tapdığını bildirib bizdəki işindən çıxmaq istədiyini dedi. İyunun 14-də ərizə yazaraq işdən çıxdı, amma bir müddət sonra isə həmin işi alınmadığı üçün geri qayıtdı. Onda isə biz artıq həmin yerə başqa işçi götürdüyümüz üçün Şövkət xanımı işə qaytarmaq alınmadı”.
Paşa Məmmədov əlavə edib ki, Şövkət Əliyevanın azyaşlı övladı ilə ərazidə işləməsi düzgün deyil: “Bir neçə gün uşağı harasa qoymağa yer tapması üçün ona güzəşt edilib. Amma fotoya görə narazılıq olmayıb”.
