Türkiyə PUA-ları və Qarabağ müharibəsi - Niderland mətbuatı yazır...

Niderlandın NOS ictimai xəbər agentliyində Türkiyənin istehsal etdiyi zərbə tipli pilotsuz uçuş aparatları (PUA) barədə məqalə dərc edilib.

Sentyabr ayında Atatürk Hava Limanında keçirilən “Teknofest” aviasiya, kosmos və texnologiya festivalına qatılan NOS müxbiri oxucuları ilə təəssüratlarını bölüşüb.

Məqalədə qeyd olunur ki, Türkiyənin hərbi sənayesi son illərdə PUA istehsalına yönəlib və ixracatını günü-gündən artırır.

Nəşr PUA-ların keyfiyyətinin həm Türkiyə daxilində, həm də xaricində sübut edildiyini vurğulayıb. Müəllif “Baykar” şirkətinin istehsal etdiyi “ucuz və təsirli” zərbə PUA-larının Qarabağ müharibəsi zamanı Ermənistana məxsus tanklara, zirehli maşınlara, sursat anbarlarına və hava hücumundan müdafiə sistemlərinə zərbələr endirərək döyüşlərin gedişatını dəyişdirdiyini bildirib.

Qeyd olunur ki, zərbə PUA-ları Suriya, Liviya və Qarabağda uğurla istifadə edilib və bunlardan sonra bir çox ölkə “Bayraktar TB2” almaq istədiyini elan edib.

Məqalədə bildirilir ki, Türkiyə qısa müddətdə ABŞ, İsrail və Çin kimi PUA sahəsində qabaqcıl istehsalçılardan biri olub.