Oktyabr ayında Laçın dəhlizindən neçə nəfər keçib?
Azərbaycan ərazilərinin bir hissəsində müvəqqəti yerləşdirilmiş Rusiya sülhməramlı kontingenti Laçın dəhlizindən oktyabr ayında nə qədər adamın və nəqliyyat vasitəsinin keçdiyini açıqlayıb.
Rusiya Müdafiə Nazirliyinin yaydığı məlumatda deyilir ki, sülhməramlı kontingentin hərbi qulluqçuları bir ay ərzində min vahidə yaxın avtomobil nəqliyyatının və 6.8 minə yaxın adamın Laçın dəhlizindən Qarabağa tranzit giriş-çıxışının təhlükəsizliyini təmin edib.
“Müşahidə postlarındakı hərbi qulluqçular öz məsuliyyət zonalarında atəşkəs rejiminə əməl edilməsinə sutka boyu nəzarət edir. Rusiya sülhməramlıları postların nəzarət-buraxılış məntəqələrindən avtomobil nəqliyyatının təhlükəsiz keçidini təmin edir. Mümkün təxribatların qarşısının alınması üçün bütün avtonəqliyyat vasitələrinə baxış keçirilir, zərurət yaranarsa yoxlanılır”, - sülhməramlıların nümayəndəsi Dmitri Yemelyanov bildirib.
