Paşinyan Qafana gedib, amma Qubadlıdan keçməyib - Korteji qrunt yolla hərəkət edib

Ötən gün Ermənistanın baş naziri Nikol Paşinyan Qafan şəhərinə baş çəkib.

"Azsiyaset" virtualaz.org-a istinadla xəbər verir ki, bu barədə erməni KİV-ləri məlumat yayıb.

Bildirilir ki, Paşinyan hakim “Vətəndaş müqaviləsi” partiyasından Qafan meri postuna namizəd David Danielyanın atasının yasında iştirak etmək üçün gedib. Danielyanın atasının koronavirusdan öldüyü bildirilir.

Qeyd edək ki, Gorus-Qafan yolunun bir hissəsi hazırda Azərbaycanın nəzarətindədir, yolun Qubadlıdan keçən 22 kilometrlik hissəsində Azərbaycanın sərhəd və polis postları qoyulub, amma Ermənistan nömrə nişanlı avtomobillər hələlik bu yoldan istifadə edə bilir. Bəs Paşinyan Qafana getmək üçün Azərbaycan ərazisindən keçibmi?

“Hraparak” qəzetinin əldə etdiyi məlumata görə Paşinyan Qafana Ermənistanı İrana birləşdirən və bir hissəsi Qubadlıdan keçən əsas yolla deyil, Tatev kəndindən keçən və hazırda təmir işləri aparılan alternativ qrunt yolla gedib. Paşinyanı 20 avtomobildən ibarət kortej müşaiyət edib, hər kəndin girişində kortejin hərəkətini izləmək və sakinlərin baş nazirə yaxınlaşmasına imkan verməmək üçün polislər düzülüb.