Azərbaycan və Türkiyə ordu komandanları Bakıda Zəfər konsertində: Qardaşlıq mesajları - VİDEO/FOTOLAR
“Qəhrəman Azərbaycan Ordusunun qazandığı bu qələbə sırf 44 günlük mübarizə ilə deyil, 30 illik qətiyyət, inamın və əzmkarlığın nəticəsində əldə olunub”.
Türkiyənin milli müdafiə naziri Hulusi Akar Bakıda 8 Noyabr - Zəfər Günü münasibətilə keçirilən tədbirdə çıxışı zamanı belə deyib.
Onun sözlərinə görə, bu, təkcə Ermənistana qarşı qazanılan qələbə də deyil: “Bu qələbə həm də uzun illərin haqsızlığa, qanunsuzluğa göz yumanlara, illərdir səssiz qalanlara da ən gözəl cavab oldu. Əziz qardaşlarımız, həmişə olduğu kimi, sevincinizi sevincimiz, kədərinizi kədərimiz olaraq bildiyimiz bu haqlı mübarizənizdə yenə də sizlərlə birlikdə olduq. Millət olaraq can qardaşlarımıza bütün imkanlarımızla dəstək olmağa çalışdıq, çünki biz bir kökdən qidalanan böyük çinarın budaqları kimiyik, böyük millətin övladlarıyıq. Biz Alparslanın, Nizami Gəncəvinin, Nəsiminin, Füzulinin, Dədə Qorqudun nəvələriyik. Bilinməlidir ki, tarixi prosesdə baş verənlər Azərbaycanla Türkiyə arasında bir sıra maneələr qoysa da, dini, dili, milliyyəti bir olan, tarixi qardaşlıq bağları ilə bir-birinə bağlı olan iki ölkə xalqının qəlblərinə heç vaxt qıfıl vurmayıb və vurmayacaq”.
Hulusi Akar Qarabağ məsələsində hər zaman Azərbaycanın yanında olan Pakistana da təşəkkür edib.
“Vətən müharibəsində iştirak edən qəhrəmanlarımız başda olmaqla hazırda quruda, dənizdə və havada, çətin relyef və iqlim şəraitində xidmət edən Azərbaycan və Türkiyə Silahlı Qüvvələrinin qəhrəman əsgərlərinin hər birinin alnından öpürəm. Yaşasın Azərbaycan-Türkiyə qardaşlığı!”, - Hulusi Akar belə deyib.
Türkiyənin müdafiə naziri daha sonra Azərbaycanın qələbəsinin regionda yaratdığı yeni imkanlar haqda da danışıb:
"Cənab Prezident İlham Əliyev və möhtərəm Prezidentimiz Rəcəb Tayyib Ərdoğan gələcək nəsillərə sülhü vəsiyyət etmək üçün çox konstruktiv yanaşma nümayiş etdirərək, sabitliyə və əməkdaşlığa əsaslanan yeni dövrün qapısını açıblar.
Biz Ermənistan hakimiyyətinin mövcud siyasətlərini bir kənara qoyub bu tarixi fürsətdən, o cümlədən bizim "altılıq" formatında əməkdaşlıq təklifimizdən istifadə etmələrini gözləyirik. Hər kəs bilməlidir ki, gələcək kin və nifrət üzərində qurula bilməz. Ermənistan düşmənçilikdən əl çəkib gələcəyə baxmalıdır. Bu anlayışla tarixi məsuliyyətimiz çərçivəsində bölgəmizdə sülh, əmin-amanlıq və sabitlik üçün səylərimizi davam etdirəcəyik”.
***
Ölkəmizdə səfərdə olan Türkiyə Respublikası Milli Müdafiə Nazirliyinin Mehteran Birliyi Heydər Əliyev Mərkəzində Zəfər Günü münasibətilə keçirilən konsertdə çıxış edib.
Konsert proqramını Azərbaycan və Türkiyənin müdafiə nazirləri, baş qərargah rəisləri, qoşun növü komandanları və digər hərbi rəhbərləri, o cümlədən hərbi qulluqçuların və şəhidlərin ailə üzvləri, qazilər izləyiblər.
Müdafiə Nazirliyindən verilən məlumata görə, əvvəlcə Türkiyə Respublikasının İstiqlal marşı və Azərbaycan Respublikasının Dövlət himni səsləndirilib.
General-polkovnik Zakir Həsənov tədbirdə çıxış edərək Müzəffər Ali Baş Komandanın rəhbərliyi ilə rəşadətli Azərbaycan Ordusunun qazandığı qələbədə Türkiyənin siyasi və mənəvi dəstəyinə görə öz təşəkkürünü bildirib. Bu şanlı qələbənin - Zəfər Gününün qardaş türk xalqı ilə birgə qeyd edildiyi, Azərbaycan-Türkiyə qardaşlığının sarsılmaz olduğu qonaqların diqqətinə çatdırılıb.
Hulusi Akar isə çıxışında xalqımızı bayram münasibətilə təbrik edərək, şanlı qələbənin qazanılmasında xüsusi qəhrəmanlıq göstərən igidlərin və şəhidlərimizin heç zaman unudulmayacağını bildirib.
Sonra Türkiyənin Mehteran Birliyi tərəfindən hərbi vətənpərvərlik mahnıları, müxtəlif marşlar, tanınmış Azərbaycan, türk və dünya bəstəkarlarının müasir və klassik əsərlərindən ibarət musiqi parçaları təqdim olunub.
Səsləndirilən musiqi nömrələri böyük maraqla qarşılanıb və qonaqlarda xoş əhval-ruhiyyə yaradıb.
