"Çingiz Təhməzovun oğluna həyətyanı torpaq sahəsi təhkim olunub, özü işlə təmin edilib" - Cəlilabad RİH
Bir neçə gün bundan öncə Cəlilabad rayon sakini Çingiz Təhməzovun sosial şəbəkələr vasitəsilə şikayət xarakterli müraciəti yayılıb. Onun müraciəti ilə bağlı Cəlilabad Rayon İcra Hakimiyyətindən açıqlama verilib.
"Çingiz Təhməzovun oğluna həyətyanı torpaq sahəsi təhkim olunmuş və ilkin sənədləşmə işlərinə başlanılmışdır. Vətəndaşın hər zaman vəziyyəti nəzərə alınaraq ayrı-ayrı vaxtlarda rayon icra hakimiyyətinin başçısı və deputat tərəfindən dəfələrlə qəbul edilmiş, həmçinin ona bir neçə dəfə maddi yardımlar göstərilmişdir".
"Azsiyaset" xəbər verir ki, bu fikirlər Cəlilabad Rayon İcra Hakimiyyətindən bildirilib.
Qeyd olunub ki, hazırda o, birmərətəbəli evdə yaşayır və 12x8 m ölçüdə əlavə fərdi yaşayış evi tikdirir:
"Çingiz Təhməzov və hayat yoldaşı Yazgül Təhməzovanın sənədləri ƏSMM yanında Tibbi-Sosoal Ekspert komissiyasına göndərilmiş, özü əlillik meyarlarına uyğun gəlməmiş, lakin yoldaşına pensiya təyin olunmuşdur. Keçən illərdə yollarına rayon icra hakimiyyəti tərəfindən qum-çınqıl materialı tökülərək normal vəziyyətə gətirilmişdir. Gələcəkdə investisiya proqramında yollarının əsaslı təmiri plana salınmışdır. Çingiz Təhməzovun yaşadığı küçə yeni yaşayış massivinə daxil olduğuna görə həmin ərazidə yaşayan vətəndaşlar təbii qazdan istifadə edə bilmir, buna görə də massivə qaz xətti çəkilməsi üçün layihə-smeta sənədləri hazırlanaraq "Azəriqaz" İstehsalat Birliyinə təqdim olunmuşdur. Əlavə olaraq bildiririk ki, vətəndaş Çingiz Təhməzov Dost İş Mərkəzində işlə təmin edilmişdir və hər ay 236 manat əmək haqqı alır".
