"Videodakı ev vətəndaşın atasına məxsusdur, həmin həyətdə yeni ev tikilib" - Qarabağ qazisi ilə bağlı açıqlama

Sosial şəbəkələrdə Vətən müharibəsi iştirakçısı, II qrup müharibə əlili Mərufov Şəhriyar Xanlar oğlu ilə bağlı video paylaşılıb. Videoda Vətən müharibəsi iştirakçısının atası Xanlar Mərufov çətin mənzil şəraitlərindən, evlərinin qəzalı vəziyyət olmasından şikayət edərək köməklik istəyir. Həmçinin o, qazi övladının üz nahiyyəsinin yeni əməliyyata ehtiyac olduğunu bildirir. 

Məsələ ilə bağlı Azsiyaset.com-a Astara Rayon İcra Hakimiyyətindən bildirilib ki, Vətən müharibəsi iştirakçısı, II qrup müharibə əlili Mərufov Şəhriyar Xanlar oğluna üzünün sağ nahiyəsi və sağ gözündən aldığı xəsarət və əlillik dərəcəsinə görə iki dəfə sığorta ödənişi olunmuşdur:

"Rayon icra hakmiyyəti tərəfindən ailəsinə bir neçə dəfə maddi və ərzaq yardımı olunmuş və müharibə qazisi kimi rayon icra hakmiyyətində ev növbəsinə götürülmüşdür. "YAŞAT" Fondunun dəstəyi ilə Şəhriyar Mərufovun sağ üz nahiyəsi və gözü müayinə olunmuş, İsrailli həkim heyəti tərəfindən ona protez göz qoyulmuş, sağ üz nahiyəsi mümkün qədər bərpa olunmuşdur. Videoda göstərilən ev vətəndaşın atasına məxsus köhnə tikilidir. Çəkiliş aparılan həyətdə vətəndaşın ailəsinə məxsus yeni ev tikilmiş və dam altına salınmışdır. Şəhriyar Mərufova mənzil şəraitinin yaxşılaşdırılması məqsədi ilə 30 iyun 2021-ci il tarixində "YAŞAT" Fondu Tərəfindən 10 000 manat maddi yardım olunmuşdur".