Atasına qızıldan heykəl qoyduran icra başçısının ərəb turistlərlə sərgüzəştləri - DETALLAR
Rüstəm Xəlilov ismi Azərbaycan cəmiyyətinə bir o qədər də tanış deyil, baxmayaraq ki, o, III çağırış Milli Məclisin deputatı kimi mandat da almışdı. Əslində Milli Məclis üzvü kimi passiv fəaliyyəti nəzərdən qaçmayan R.Xəlilov yalnız bircə dəfə ictimaiyyətin nəzər nöqtəsinə çevrilə bilmişdi. Onu da Sabirabad rayonunda atası Gülabba Xəlilova qızıldan heykəl qoydurmaqla... Bu gün R.Xəlilov icra başçısıdır, o, 2019-cü il dekabrın 4-dən Hacıqabul Rayon İcra hakimiyyətinə rəhbərlik edir.
Bəs R.Xəlilov niyə diqqətimizi çəkdi? Həm deputat olduğu müddətdə, həm də indiki dövrdə cəmiyyətdən gizlənməyi xüsusi peşəkarlıqla bacaran R.Xəlilovun adı olduqca maraqlı proseslərdə çəkilir.
Məsələn, redaksiyamıza daxil olan məlumatda göstərilir ki, R.Xəlilov kürəkənlərinə məxsus şirkətləri dövlət tenderlərinin qalibi elan edir. Xüsusilə də, Hacıqabul rayon icra hakimiyyətinin, ayrı-ayrı qurumların elan etdiyi tenderlərin əsas qalibləri məhz R.Xəlilovun kürəkənlərinə məxsus şirkətlərdir. Qeyd edək ki, R.Xəlilovun 4 kürəkəni var, oğlan övladı olmadığına görə, o, özünün "biznes-ticarət" resurslarını da kürəkənləri, digər yaxınları vasitəsilə formalaşdırır. Həmin tender şirkətləri ilə bağlı redaksiyamızda ilkin məlumatlar olsa da, məsələni tam araşdırandan sonra yenidən bu mövzuya qayıdacağıq.
Başqa bir maraqlı məlumata diqqət edək. Yadınızdadırsa, bu ilin mart ayında ərəb turistlərin Qax Dövlət Təbiət Yasaqlığında ov etməsi, nadir quşları ovlaması, bundan əvvəl isə Acınohur çölündə göyərçinləri dronlara bağlayaraq, özlərinin bəslədikləri ov şahinlərinin yeminə çevirmələri ciddi ajiotaja səbəb olmuşdu. Ərəb turistlər bu qanunsuz ov əməliyyatlarını Hacıqabul rayonunda da həyata keçirmişdilər.
Azsiyaset.com saytında ərəb turistlərin ölkəyə səfərini təşkil edən məmurlar haqqında dəfələrlə məqalələr də dərc olunub. Şəbəkə halında birləşən bir sıra məmurlar yüksək qazanc əldə etmək məqsədilə ərəb turistləri ölkəmizə gətirir, onların qanunsuz ov etmələrinə şərait yaradırlar. Məsələ bundadır ki, ərəb turistlər qanunsuz hərəkətləri Hacıqabul rayonunda dəfələrlə aşkarlanıb. Bildirilir ki, ərəb turistlərə qanunsuz ov etmələri üçün şərait yaradan məmurlar içərisində icra R.Xəlilovun da var. Adi bir sual bir çox qaranlıq məqamlara işıq salır. İcra başçısının icazəsi olmadan Hacıqabul rayonunda ov tədbirləri təşkil oluna bilərdimi? Əlbəttə ki, xeyr! O zaman xəbəri olubsa, icra başçısı nə üçün bunun qarşısını almayıb? Əgər qarşısını almayıbsa, deməli, burada iki ehtimal önə çıxır: birincisi, o, ya ərəb turistlərlə "anlaşıb", ikincisi, ya da yuxarıdan gələn hansısa zənglə bu qanunsuzluğa göz yumub. Hər iki halda əsas məsuliyyət sahiblərindən biri də məhz R.Xəlilovdur. Çünki söhbət Azərbaycan təbiətinin və ovlanması qadağan olunan heyvanların məhv edilməsindən gedir. Hər halda bütün Azərbaycan cəmiyyəti üçün həssas bir nöqtəyə çevrilən ərəb turistlərin təbiətimizi məhv etməsi prosesinin bir nəticəsi olmalıdır. Bu məsələdə günahı olan, vasitəçi kimi iştirak edən hər bir məmur məsuliyyətə cəlb edilməlidirlər. Elə redaksiyamızda olan məlumata görə,müəyyən bu məsələdə işbirliyi olan hər bir məmurla bağlı ciddi tədbirlər görüləcək. Çünki təbiətin qorunması hər birimiz üçün, xüsusilə də, Ölkə rəhbərliyi üçün olduqca həssas məsələdir.
Bir məsələyə də xatırlatma üçün toxunaq. R.Xəlilov özünün "Google"-dakı Vikipediyasında - tərcümeyi-halında dəyişiklik etsə, daha yaxşı olar. Məsələn, R.Xəlilovun vikipediyasının "Fəaliyyəti" bölməsində "siyasətçi" olaraq qeyd edilir. Ancaq o, 2014-cü ildə KİV-lərə verdiyi müsahibədə qeyd edir ki, "siyasətin iki yox, min sifəti var, mən özümü siyasətçi hesab etmirəm...".
Azsiyaset.com
