Saatlı RİH Qarabağ qazisi ilə bağlı yayılan videogörüntülərə aydınlıq gətirdi
Sosial şəbəkələrdə Qarabağ qazisi, Saatlı rayonu Mustafabəyli kənd sakini Əliyev Hüseyn Siran oğlunun çətin mənzil şəraiti ilə bağlı video yayılıb. Görüntülərdə iddia olunur ki, Əliyev Hüseynin evi sökülüb və ona yeni ev tikiləcəyi ilə bağlı vəd verilib, ancaq hələ də mənzil tikilərək ona təhvil verilməyib.
Saatlı Rayon İcra Hakimiyyəti Qarabağ qazisi ilə bağlı yayılan videogörüntülərə aydınlıq gətirilib.
İcra Hakimiyyətindən bildirilib ki, qeyd olunan məsələ ilə əlaqədar aidiyyəti üzrə xidməti araşdırma aparılıb və müəyyən olunub ki, Əliyev Hüseyn Siran oğlu təqdim etdiyi sənədlər əsasında 2012-ci ildə Qarabağ müharibəsi əlili kimi Saatlı rayon İcra Hakimiyyətində mənzil növbəliliyinə götürülüb:
"Və bu kateqoriyadan olan şəxslərin mənzil məsələsinə baxılması üçün onların adlı siyahısı il ərzində (mənzil növbəsində dayanan şəxslərə mənzil verilməsi və ya fərdi yaşayış evi tikilməsi Saatlı rayon İcra Hakimiyyətinin səlahiyyətinə aid deyil) aidiyyəti üzrə Əmək və Əhalinin Sosial Müdafiəsi Nazirliyinə göndərilmişdir. Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyindən rayon İcra Hakimiyyətinə daxil olmuş 24 dekabr 2020-ci il tarixli 20830055634 nömrəli məktubda Saatlı rayonunda mənzil növbəliliyinə götürülmüş 19 nəfər Qarabağ müharibəsi əlilinin və şəhid ailəsinin, o cümlədən vətəndaş Hüseyn Əliyevin mənzil şəraitinin yaxşılaşdırılmasının nəzərdə tutulduğu bildirilmiş, həmin şəxslərə kommunikasiya xətlərinə yaxın torpaq sahəsinin ayrılması və bu barədə məlumatların Agentliyə təqdim edilməsi xahiş olunmuş və məktubun icrası ilə əlaqədar rayon İcra Hakimiyyətinin əməkdaşlarının iştirakı ilə H.Əliyevin həyətyanı sahəsinə sadəcə baxış keçirilmiş, 25 yanvar 2021-ci il tarixli 03/184 nömrəli məktubla Agentliyə cavab məktubu ünvanlanaraq H.Əliyevin kommunikasiya xətlərinə yaxın həyətyanı torpaq sahəsinin olduğu bildirilmişdir".
RİH-i daha sonra qeyd edir:
"Əlavə məlumat üçün nəzərinizə çatdırırıq ki. Vətəndaş Hüseyn Əliyevin evinin tikintisinin yarımçıq dayandırılması ilə bağlı rayon İcra Hakimiyyətinə və yuxarı rəhbər orqanlara etdiyi müraciətləri əsasında məsələnin araşdırılması və müvafiq köməklik göstərilməsi üçün Saatlı rayon İcra Hakimiyyətinin başçısı tərəfindən Əmək və Əhalinin Sosial Müdafiəsi Nazirliyinə 12 avqust 2021-ci il tarixli 01/1726 nömrəli məktub ünvanlanmışdır".
Onu da qeyd edək ki, Hüseyn Əliyevin evinin tikintisinin yarımçıq dayandırılması ilə bağlı mübahisəli məsələ Azərbaycan Respublikası Şirvan İnzibati Məhkəməsinin icraatındadır və hazırda araşdırma aparılır.
