Şəhid məzarı ilə bağlı Cəlilabad RİH-dən açıqlama - "Şəhidin qardaşı təklifimizi geri çevirir"
Bəzi saytlarda Birinci Qarabağ Savaşında qəhrəmancasına şəhid olan əsgər Aslan Əliyevin Cəlilabad rayonunda yerləşən məzarının yararsız halda olması və şəhid ailəsinin məzarın təmir edilməsi ilə bağlı rayon icra hakimiyyətindən müsbət cavab almaması ilə bağlı məlumatlar dərc edilib.
Məsələ ilə bağlı Cəlilabad Rayon İcra Hakimiyyətindən Azsiyaset.com-a bildirilib ki, şəhid məzarlarının təmir olunması üçün rayon icra hakimiyyətinin xərclər smetasında vəsait nəzərdə tutulmamışdır:
"Lakin şəhidin qardaşı Nail Əliyevə imkan daxilində məzarın təmir olunması təklif olunsa da o, bu təklifi geri çevirmişdir və məzarın sökülərək qara mərmər daşından yenidən inşa edilməsini tələb etmişdir. Əlavə olaraq qeyd edək ki, Nail Əliyev və şəhidimizin bütün ailə üzvləri daim diqqət mərkəzində saxlanılmışdır. Bunun nəticəsidir ki, Nail Əliyev hazırda Əmək və Əhalinin Sosial Müdafiəsi Nazirliyi tərəfindən tikilən 5 otaqlı mənzildə yaşayır və özü ucqar kəndlərimizdən birində yaşamağına baxmayaraq Dost İş Mərkəzində sosial işlə təmin edilmişdir. Şəhidimizin digər qardaşı Nurəddin Əliyev isə ata evində yaşayır və həmin evin təmir olunması üçün rayon icra hakimiyyəti imkan daxilində köməklik göstərmişdir. Yaxın zamanlarda isə digər qardaş olan Coşqun Əliyevin yoldaşı da müraciəti nəzərə alınaraq Cəlilabad şəhər 9 saylı tam orta məktəbində işlə təmin edilmişdir".
