Çöllük ərazidə yaşayan Əzəmət Mikayılova haqda Ağsu RİH-dən AÇIQLAMA

Ağsu Rayon İcra Hakimiyyəti rayonun Ərəbmehdibəy kəndində tənha yaşayan Mikayılova Əzəmət Möhübbət qızı bardə məlumat yayıb. 

Məlumatda bildirilir ki, Ağsu rayonunun Ərəbmehdibəy kəndində tənha yaşayan Mikayılova Əzəmət Möhübbət qızı 1990-cı ildə atası ilə birlikdə heyvandarlıq fermasında işləmək üçün Kürdəmir rayonundan Ağsu rayonunun Ərəbmehdibəy kəndinə gəlmişdir:

"Sonralar aidiyyəti dövlət orqanları tərəfindən tənha yaşadığı və qayğıya ehtiyacı olduğu nəzərə alınaraq vətəndaş Ə.Mikayılova Kürdəmir rayonunda yaşayan qardaşına təhvil verilmişdir. Lakin, Ə.Mikayılova qardaşı ilə birlikdə yaşamaqdan imtina etmiş və yenidən Ərəbmehdibəy kəndinə qayıdaraq orada tənha yaşamağa davam etmişdir. Əlavə olaraq bildiririk ki, səhhətində  problemlər olduğundan vətəndaş Ə.Mikayılova “Ağsu Rayon Mərkəzi Xəstəxanası” Publik Hüquqi Şəxsi tərəfindən müayinə və müalicə olunması məqsədilə  xəstəxanaya göndərilmişdir".

"Azsiyaset" xəbər verir ki, Sosial Xidmətlər Agentliyi də həmin vətəndaşla bağlı məlumatı yayıb. Məlumatda Əzəmət Mikayılova adlı vətəndaşın yaşadığı əraziyə səfər edildiyi qeyd olunur:

“Yerində ilkin müayinə üçün əraziyə tibbi-həkim briqadası da dəvət olundu. Vətəndaş ilkin müayinəsi aparılaraq Daxili İşlər Nazirliyi, yerli icra hakimiyyəti nümayəndəsi və təcili tibbi yardım əməkdaşlarının iştirakı ilə Ağsu Rayon Mərkəzi Xəstəxanasına yerləşdirildi.
Buradan isə onun səhhətində olan problemlər nəzərə alınaraq, aidiyyəti ixtisaslı tibb müəssisəsinə göndərildi. Əzəmət Mikayılova barəsində məlumat verən hər kəsə və o cümlədən, onunla bağlı prosesdə iştirak edən aidiyyəti qurumların əməkdaşlarına təşəkkür edirik!”.