"3 dəfə Prezidentlə görüşməyimə baxmayaraq, Hacıbala Abutalıbov mənə dedi ki..."
“İndiyə qədər bir çox bahalı saatları təmir etmişəm. Bir dəfə 200 minlik saat gətirmişdilər, ehtiyat hissələri 900-1000 manat arası idi. Bu saatı təmir etdiyimə görə mənə 200 manat zəhmət haqqı verdilər. Hətta saatın görüntülərini də sosial şəbəkədə paylaşmışdım. Dünyada elə bir saat yoxdur ki, onu mən təmir edə bilməyim. İtalyanlar Bakıda olanda mənim haqqımda da gəlib film çəkmişdilər. Sənətkarın pisi, yaxşısı yoxdur. Sadəcə olaraq işini sevməli, səbrli olmalısan”.
"Azsiyaset" xəbər verir ki, bunu moderator.az-a açıqlamasında məşhur saatsaz Hacı Fətəliyev deyib.
O daha sonra əlavə edib:
“Uzun illərdir ki, 5 kvadratlıq yerdə çalışıram. İşim günü-gündən çoxalır, özüm də yaşlanmışam, orada hərəkət etmək mənə çox çətindir. Respublikanın 85 faizi saatını məndə düzəltdirir. Ehtiyat hissələri yığmağa, saat asmağa yer tapa bilmirəm. Çox istərdim ki, hər bir ölkədə olduğu kimi bizim şəhərdə də gözəl bir yerdə, böyük bir saat emalatxanası tiksinlər və mən də saatsaz kimi orada çalışım. Ətrafıma da 5-10 saatsaz gətirib, bu sənəti inkişaf etdirək. Xarici qonaqlar gəlib mənə deyirlər ki, siz məşhur adamsınız, sizin işlədiyiniz yer budur?! İnanırsınız orada havasızlıqdan əziyyət çəkirəm. O vaxt Bakı şəhər İcra Hakimiyyətinin başçısı Hacıbala Abutalıbov idi. Ona ərizə ilə müraciət etmişəm, yanında da olmuşam. Məni qəbul etmədi, küçədə mənimlə görüşüb dedi ki, mümkün deyil, yer verə bilmərik. Prezidentə də müraciət etmişəm, heç bir cavab gəlməyib. Bilirəm ki, yazdığım məktublar cənab prezidentə çatmayıb. Çatsaydı o mütləq şəkildə mənə köməklik göstərərdi. Çünki cənab prezident məni çox yaxşı tanıyır, 3 dəfə onunla Tarqovuda görüşmüşəm. Hətta o mənə demişdi ki, ay Hacı, sənin səsin-sorağın bütün Prezident Administrasiyasını götürüb, hamı səni tərifləyir, yaxşı sənətkarsan, halal olsun sənə!”- deyə saatsaz bildirib.
