"Tərtər işi"nə görə həbs edilənlərdən biri hərbi hissə komandiridir
Xəbər verdiyimiz kimi, Baş Prokurorluq Tərtər hadisələri ilə bağlı həbs olunan bir sıra şəxslərin adlarını açıqlayıb.
Cinayət işinin istintaqı zamanı ayrı-ayrı hərbi qulluqçulara işgəncə verməsi, onları qanunsuz azadlıqdan məhrum etməsi və vəzifə səlahiyyətlərini aşması müəyyən edilən Ələsgərov Vüsal Əziz oğlunun rütbəsi polkovnik olub. O, Tərtər rayonunda yerləşən N saylı hərbi hissəsinin komandiri kimi 2017-ci ilin aprel-may aylarında tabeliyində olan şəxsləri təhqir etməkdə, döyməkdə, işgəncə verməkdə ittiham edilib.
Tərtər Hərbi Məhkəməsinin 29 yanvar 2020-ci il tarixli hökmü ilə ona elan edilmiş qəsdən sağlamlığa az ağır zərər vurma və əzab vermə ittihamları sübuta yetirilmədiyindən bu maddələr üzrə komandirə bəraət verilib.
Yekunda V.Ələsgərov 3500 manat cərimə olunmaqla həbs edilməyib. Hazırda yenilənən istintaqla polkovnikə Cinayət Məclləsinin 145.3 (qanunsuz azadlıqdan məhrum etmə), 293.2 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma) və 341.2.3-cü maddələri ilə ittiham elan olunub.
CM-nin 127.2.2 (qəsdən sağlamlığa az ağır zərər vurma), 145.3, 293.3, 341.2.2 və 341.2.3 maddələri ilə təqsirləndirilən Axundov Fuad Arazi oğlu isə ədliyyə mayoru olub. O, N saylı hərbi hissədə Vüsal Ələsgərovun hüquq işləri üzrə köməkçisi kimi çalışıb. Tərtər hadisələri zamanı qeyri-qanuni sorğulama məntəqəsi yaradıb. Düşmən xüsusi xidmət orqanları ilə əməkdaşlıq etməkdə şübhələndiyi hərbçiləri Vüsal Ələsgərov vasitəsilə həmin məntəqəyə aparıb. Hərbi hissənin kəşfiyyat bölüyünün əsgərlərini isə qanunsuz olaraq həmin məntəqədə öz əməllərini törətmək üçün istifadə edib. Belə ki, Fuad Axundovun rəhbərliyi ilə kəşfiyyat bölüyünün 14 hərbi qulluqçusu düşmənlə əməkdaşlıqda şübhəli bilinən hərbçilərə işgəncələr verib. İşgəncəyə məruz qalan 109 nəfər hərbçidən 8 nəfəri buna dözməyərək vəfat edib.
Qeyd edək ki, ötən ilin dekabrında “Tərtər işi”nin araşdırılması ilə bağlı yeni istintaq qrupu yaradılıb. İşgəncəyə və digər qanunsuz əməllərə məruz qalmış 163 yeni şəxs müəyyən edilərək zərərçəkmiş şəxs qismində tanınmaqla işin halları üzrə tam, hərtərəfli dindirilib, onların məhkəmə-tibbi ekspertizadan keçirilmələri təmin edilib. Beləliklə, işgəncə faktları üzrə əvvəlki istintaq zamanı zərərçəkmiş kimi tanınmış şəxslərlə birlikdə cinayət işləri üzrə hal-hazıradək ümumilikdə 281 zərərçəkmiş şəxs müəyyən edilib. İş üzrə zərərçəkmiş şəxslərin müəyyən edilərək dindirilməsi prosesi davam etdirilir.
İşlə bağlı həbs edilən digər iki nəfər isə Ələsgərov Rüstəm Çərkəz oğlu və Qarayev Ramil Fariz oğludur. Onlara da Vüsal Ələsgərovla eyni ittihamlar irəli sürülüb(qafqazinfo.az).
