Qafan merindən etiraflar - "Daha nədən imtina edə bilərik?"
İranı Ermənistanla birləşdirən alternativ yol bu gün yük maşınları üçün keçilməzdir.
Bunu Ermənistanın NEWS.am müxbirinə müsahibəsində Qafan şəhərinin meri Gevorq Parsyan deyib.
“Bizim İrandan Ermənistana gedən iki yolumuz var idi, biri Vorotandan (Şahverdilər- red), digəri alternativ isə Tatev yolundan keçirdi, indi sonuncu istifadə etmək imkanımız olan yeganə yoldur. Artıq demişəm, indi də təkrar edirəm: Tatev alternativ yolu yük maşınları üçün çətin yoldur. Yük maşınları üçün real təhlükə yaradan hissələri var, deyəsən, indi dolama alternativ yol çəkilir. Bunlar Tatev-Ltsen avtomobil yolu və Verin Xotanan kəndinin dolama yoludur”, - Parsyan bildirib.
Qeyd edək ki, alternativ yolun tikintisi hələ başa çatmayıb və Ermənistana daxil olan yük maşınları çox vaxt yolda, palçıqda batıb qalır
Parsyan çətinliklərə baxmayaraq, Şahverdilərdən keçən əsas yolun erməni nəzarətinə qaytarılmasını mümkün hesab edir. Yada salaq ki, o, müharibədən sonra – şifahi razılaşma nəticəsində Azərbaycana təhvil verilib.
"Hər şey mümkündür, yalnız iradə, istək və düzgün siyasət lazımdır, düşünürəm ki, hər şey mümkündür", - deyə mer bildirib.
Qafan yaxınlığında mövqelərini yenidən itirəcəyi ilə bağlı mətbuatda yayılan məlumatlara toxunan Parsyan bildirib ki, onda belə bir məlumat yoxdur. “Bizim heç bir mübahisəli zonamız yoxdur ki, ondan imtina edək. Başqa nədən imtina edə bilərik? Başqa heç nədən. Güzəştlər olarsa, biz yaşayış məntəqələrimizdən imtina etməli olacağıq”, - deyə Parsyan bildirib.
O, həmçinin Qafan yaxınlığında təhlükəsizlik zonasının yaradılmasının vacibliyini qeyd edib. “Düşmənin Qafanla yaxın məsafəsi artıq təhlükədir. Belə olan halda Azərbaycan qoşunlarının çıxarılması ilə təhlükəsizlik zonasının yaradılması çox vacibdir, çünki onlar yaşayış məntəqələrimizə birbaşa problemlər yaradırlar. Mən qoşunlarımızın çıxarılmasını təsəvvür edə bilmirəm. Belə olan halda, yalnız Azərbaycan qoşunları çıxarılmalıdır, çünki onlar yaşayış məntəqələrimiz üçün birbaşa təhlükədir”, - deyə o, yekunlaşdırıb.
