Rövnəq Abdullayev qanunu kobud şəkildə pozdu və cərimələndi - RƏSMİ

İqtisadiyyat nazirinin müavini Rövnəq Abdullayevə məxsus avtomobillə yol hərəkəti qaydası pozulub.

Bakı Şəhər Dövlət Yol Polisi İdarəsinin (BŞDYİ) baş inspektoru, polis mayoru Araz Əsgərli modern.az-ın sorğusuna cavab olaraq bildirib ki, bu halda avtomobili idarə edən şəxs İnzibati Xətalar Məcəllləsinin 346.2-ci maddəsi ilə məsuliyyət daşıyır:

"Yəni ümumi istifadədə olan nəqliyyat vasitələrinin dayanacaq meydançasında və ya 5.12, 5.13 yol nişanlarından 15 metrdən az yaxınlıqda digər nəqliyyat vasitələrinin dayanması və ya durması qaydasınının pozulması kimi qiymətləndirilir. Sürücünü törətdiyi qayda pozuntuna uyğun olaraq 40 manat məbləğində cərimə gözləyir. İnzibati xətanın törədən sürücü məsuliyyətə cəlb olunacaq".

A.Əsgərli bir daha sürücülərdən yolların hərəkət istiqamətlərində dayanma-durma qadağan olunan ərazilərdə yol hərəkəti qaydalarının tələblərini pozmamağı xahiş edib və diqqətli olmağa çağırıb.

Qeyd edək ki, 90-AA-999 qeydiyyat nişanlı "Mercedes Maybach" markalı avtomobilin sürücüsü martın 13-də paytaxtın Əhməd Rəcəbli küçəsində dayanma-durma qayadasını kobud şəkildə pozub. Belə ki, sürücü həm avtobus zolağında, həm də avtobus dayanacağında avtomobili park edərək oradan uzaqlaşıb.

Məlumat üçün bildirək ki, 90-AA-999 qeydiyyat nişanlı avtomobil "Black Sapphire" şirkətinə məxsusdur. Həmin şirkətin Rövnəq Abdullayevə məxsus olduğu deyilir.

Eyni zamanda bu avtomobillə yanaşı 10-AA-999 və 99-AA-999 qeydiyyat nişanlı avtomobillərin də Rövnəq Abdullayevə məxsus olduğu bildirilir.