"Bakının bombalanmasını" istəyən "Rossia-24" niyə bloklanmır?!

Bütün dünya mediasının diqqət mərkəzində olan Rusiya-Ukrayna müharibəsində Azərbaycan mediası obyektivliyə söykənən məlumatların tirajlanmasına üstünlük verən azsaylı medialardandır. Həm Ukrayna, həm də Rusiya tərəfinin döyüşlərlə bağlı məlumatları yayımlanır, hər iki tərəfə söz haqqı tanınır. Təbii ki, Ukraynanın ərazi bütövlüyünün pozulması bütün bunların kontekstində dəyişməz fakt olaraq qalmaqdadır.

Lakin Rusiyada Azərbaycanın bir neçə rusdilli media resursunun yayımı anti-Rusiya təbliğatı iddiası ilə bloklanıb. Təəccüblü, həm də ədalətli olmayan mövqedir. Çünki Azərbaycan mediası Rusiyanın rəsmi məlumatlarına istinad etdiyi kimi, Ukraynanın da rəsmi məlumatlarına istinad edir və belə bir iddia ilə bloklama qərarı yumşaq desək obyektiv deyil.

Hərçənd ki, məsələ təkcə bununla da bitmir. Rusiya Dövlət Dumasının deputatı Mixail Delyaqin “Rossia-24” telekanalında Bakı birbaşa hücum çağırışı etdi.

Delyaqin deyir ki, Bakının neft yataqları nüvə silahı ilə vurulmalıdır.

Dövlət Dumasının deputatının belə bir çağırışının absurd olduğu aydındır. Burada əsas məqam “Rossia-24” kanalının niyə belə çağırışlara platforma olmasıdır.

Mixail Delyaqin “60 minut” verilişinin efirində bu çağırışı edəndə nə aparıcı ona etiraz etdi, nə də digərləri. İddia edə bilərlər ki, bu, Delyaqinin şəxsi fikirləridir. Halbuki, bu şəxs küçədən keçən deyil, Dövlət Dumasının deputatıdır, Rusiya Təhlükəsizlik Şurası yanında Elmi Şuranın üzvdür, 2-ci dərəcəli həqiqi dövlət müşaviridir. Yəni, onun çağırışını diqqətə almamaq mümkün deyil. Belə bir şəxsin “Rossia-24” telekanalının efirindən Azərbaycana qarşı “bombardman edilsin” çağırışı təkcə məsuliyyətsizlik yox, Rusiyada hansısa dairələrin düşündüklərinin açıqlanması kimi də qəbul edilə bilər.

Buna paralel olaraq, “Rossia-24” telekanalının bu kimi təhdidlərə platforma olması bu kanal haqqında düşünməyi vadar edir. Xüsusilə Azərbaycanın media resurslarının qərəzli şəkildə Rusiyada bloklanması fonunda sual yaranır ki, ölkəmizə qarşı hücum təhdidlərini tirajlayan belə telekanal niyə bizdə bloklanmamalıdır?

Azərbaycan mediası təkcə Ukraynanın rəsmi məlumatını yayımladığı üçün Rusiyada bloklanır, lakin “Bakını bombalamaq” çağırışını tirajlayan “Rossia-24” telekanalı hələ də Azərbaycanda yayımlanır. 

Bu telekanal 44 günlük Vətən müharibəsində də anti-Azərbaycan təbliğatı aparırdı, işğalçı Ermənistanın mövqeyinə üstünlük verirdi. Həmin vaxt Azərbaycan dövləti humanist yanaşma və dözümlülük sərgiləyərək, telekanalı bloklamadı. Görünür ki, telekanalın rəhbərliyi cəzasızlıq mühitindən daha da ruhlanıblar və “Bakının bombalanması” kimi təhdidləri tirajlayırlar. Azərbaycan media resurslarını haqsız yerə bloklayan Rusiyadan fərqli olaraq, “Bakının bombalanmasını” istəyən “Rossia-24” telekanalını bloklamağa Azərbaycanın tam haqqı var.

Vasif Həsənli
Demokrat.az xəbər portalının baş redaktoru